17-inik ukiulik Nuummeersoq Abraham Josefsen siorna aggustimi AFS-erluni atuariartorluni aallarpoq. Den Dominikanske Republik Amerika Kujallermiittoq qaammatini qulini najugassani tikeqqaaramiuk Kalaallit Nunaanniit allaaneroqisoq paasisimavaa.

- Den Dominikanske Republik tikeqqaarakku kianaarujussuarpara, aamma nunani kiattuniinnikuunnginnama. Tupaallaatigaara inuit imminnut oqaluukkaangamik qanoq nipitutigisarnerat, sivitsorneranili sungiukkiartorpara, Abraham Josefsen tupaallalaarsimasoq oqarpoq.

Santo Domingomi 100.000-ingajannik inulimmi Abraham Josefsenip angajoqqaarsiai qatanngutisiaalu marluk najugaqarput. Atuarfigiligaani pissutsit nunatsinni atuarnermi ilisimasatsinniit allaanerusimapput.

- Atuarfigisara Kalaallit Nunaannut sanilliullugu sukannerneroqaaq. Atuartut pimoorussisorujussuupput tamarmillu uniformeqartarlutik. Ilinniartitsisut atuartunit ataqqineqarluarput, atuarfimmilu mobileqartoqaqqusaanani, Abraham Josefsen unnersiorpoq.

Inooriaaseq allaaneq

Abraham Josefsen atuarfigisaminiileqqaarami atuartunut allanut akuuniarnini aallaqqaammut unammillernatilaarsimagaluarpaa, sivitsunngitsorli kammalaatitaarluni. Den Dominikanske Republikkimi innuttaasut aningaasateqarpallaannginnerat aamma malunnarsimavoq.

- Kammalaatikka ilaatigut aningaasaateqarneq ajorput, sapaatilli akunnerisa naanerini aningaasarsisimagaangata aneertarpugut. Kammalaatikka inussiarnersorujussuupput ilakkuminarlutillu, aamma maluginiarpara kalaallinut sanilliullugit tukkornerusut, Abraham Josefsen oqarpoq.

Misigisat puigunaatsut

Den Dominikanske Republikkimi misigisassat ilaat Nuummiumut puigunaatsuusimapput. Ilaatigut ukioq manna junimi nipilersoqatigiit Barbarella tusarnaartitsisut tusarnaariarsimavai inuit 14.000-it tusarnaariat akornanni. Puigunngisaannagassaminillu aamma misigisaqarsimavoq.

- Ullut ilaanni kammalaatinni tukkusussaallunga sialussuarujussuarpoq. Sininniaruttorluta kammalaatima anaanaa nilliarpalulerpoq, sunaaffa imeq inaannut isaalersoq. Tuaviortumik innaallagissamut tunngasut qaqipallappagut. Naggataagut seeqqugut angullugit portussusilimmik inaat imermik immappoq. Misigisaq immikkullaarilluinnartuuvoq puigorallarunnanngilaralu, Abraham Josefsen oqarpoq.

Abraham Josefsen aggustimi Nuummi ilinniarnertuunngorniarluni aallartippoq. Abrahamip Den Dominikanske Republikkimut AFS-ernerani Royal Greenland aningaasaleeqataavoq.

Allattoq: Nathan Kreutzmann, nakr@royalgreenland.com

Assit: Nammineq pigisat

Asseq

 
 

Royal Greenland aperiguk

i
Write the text from the image