Suliniut Urchin tassaavoq EU-p aningaasaateqarfia Northern And Arctic Peripheri programme( NPA) aqqutigalugu eqqusanik aalisarnermi periutsinut, ingerlatsinermut, pitsanngorsaanernut, assartuinermut allaffissornikkullu ingerlatsinermut tunngasunik suliaqartut Norgimiit Islandimiiit, Irlandimiiit Skotlandimiit aammalu Kalaallit Nunaaniit peqataaffigineqartumut aningaasaliiffigineqarluni suliniut.

Nikoline Ziemer biologiusoq Royal Greenlandimi Kalaallit Nunaanni tunisassiassanik inerisaanermik immikkoortortami ingerlatsisutut eqqusat nunatsinni aalisarneqarsinnaaneri pillugit misissuilluni suliaqarnini aqqutigalugu Nunani avannarlerni eqqusat pillugit suliaqartut allat peqatigalugit suleqatigiissitami Urchinimi suleqataavoq. Nikoline Ziemer suleqatigiissitami siulersuisoqatigiinni ilaasoq oqarpoq suliniummi Urchinimi suliat inerneri nittartakkami saqqummiunneqartarumaartut.

- Suliniut Urchin suliassanik assigiinngitsunik arfinilinnik imaqarpoq. Suliniutini assiginngitsuni peqataasut tamarmik immikkut anguniagaqarput.Sulinermi ilisimalikkatik soorlu eqqusat naleqquttumik aalisarneqarsinnaanerinut, pisat qanoq peqqumaasiarisinnaanerinut aammalu eqqusat qanoq kinguaassiortinneqarsinnaanerinut qanorlu tunisassiarineqartut tuniniarneqarsinnaanerinik tunngasunik ilisimalikkanik suleqatigiit nittartakkakkut saqqummiussisartussaapput, Nikoline Ziemer oqarpoq nangipporlu:

- Suleqatigiit saqqummiuttagassaat tassaassapput eqqusanik aalisalernermi suliaqartunut aqqutissiuissinerit aammalu siunnersuutit. Tassa eqqusanik aalisalernermi assartuinermilu allatulluunniit aalisalernermi unammillernartunik naammattuuisoqartillugu eqqumaffigisassaannik siunnersuutinik nittartakkakkut saqqummiussisoqartassaaq.

Urchinimi suleqatigiaat suliassaat siulleq tassaavoq eqqusat kinguaassiortarnerannut tunngasunik paasissutissanik katersineq.

Suliniummi Kalaallit Nunaat peqataanermigut eqqusanik aalisarnermi ilisimasaqarluartunik suleqateqalerpoq taamatuttaaq eqqusat pillugit ilisimatusarnikkut ilisimasat iluaqutigisinnaanngorpai.

Nittartakkami http://urchinproject.com, suliniut Urchin pillugu, sulinermi pilersaarutit aammalu piffissami aggersumi pisussat pillugit paasiniaasoqarsinnaavoq.

Nunani avannarlerni suleqatigiit suliniummi Urchinimi suleqatigiinnerat 2018-ip tungaanut ingerlassaaq.

Allattoq: Inga Egede, ineg@royalgreenland.com

Foto: Nikoline Ziemer, Inga Egede

Asseq

 
 

Royal Greenland aperiguk

i
Write the text from the image