Pa- Ajuusaarutigaarput imissaaleqineq pissutigalugu saarulleqarluarleruttornerata nalaani saarulliit nerpiinik tunisassiornerput unitsittariaqaleratsigu aammalu sulisut 20-it angerlartiinnartariaqaleratsigit. Kisianni tassa Nukissiorfinniit imissaaleqinerup aaqqinneqarnissaata tungaanut allamik periarfissaqanngilagut, Kangaatsiami Royal Greenlandip tunisassiorfiani ingerlatsisoq Abia Thorsteinsen oqarpoq.

Tunisineq unitsinneqaratarsinnaavoq

Tunisassiorfimmut saarullinnik tunisineq unitsinneqanngilaq, kisiannili sapaatip akunnerata ataatsip iluani tunisineq unitsinneqaratarsinnaasoq tunisassiorfiup pisortaata oqaatigaa.

- Tallimanngorneq tikillugu saarulliit nerpiliarialugit tunisassiarisarsimasavut maanna blokkinngorlugut qirititerpavut. Aalisakkat blokkinngorlugit qerititat initunerujussuummata sapaatipa akunnerata iluani quersuaq qeritsitiviutigisoq ulikkaariaannnaavoq. Silap qanoq innera apeqqutaalluni sapaatiip akunnerata ingerlanerani saarullinnik tunisineq unitsinneqaratarsinnaavoq, Abia Thorsteinsen oqarpoq nangipporlu:

- Quersuaq qerititsiviutigisoq sapaatiummat imaarneqaraluartoq aatsaat oktoberip 21-iani umiarsuaqaqqissaaq. Aalisartut bungarnersorlutik aalisartut pisaqarluartaleruttormata naatsorsuutigaara aamma ulluni aggersuni tunisilluassasut. Quersuaq qerititsiviutigisoq ulikkaassappat tunisinerup matuneqarsinnaanera avaqqunneqarsinnaanngilaq, taamaattoqassappallu aammaarluta sulisut qulit angerlartiinnartariaqalissavavut, Abia Thorsteinsen oqarpoq.

Abia Thorsteinsen aamma oqarpoq Kangaatsimi immikkut ittumik umiarsuaqarsinnaanera pisinnaanngitsoq umiarsuaq assartuisup Aqqaluk Itttuup amoqqanera pissutigalugu.

- Ajoraluartumik immikkut ittumik umiarsuaqarsinnaanera periarfissaanngilaq Rotal Arctic Linep umiarsuaataa maani assartuisoq Aqqaluk Ittuk amoqqammat.

Kangaatsiami Royal Greenlandip tunisassiorfia 100 tonsinik imaqarsinnaasumik qeritisiviutigisumik quersuaqartoq majimi saarulliit nerpiinik tunisassiorluni aallartippoq. Saarulliit nerpiinik tunisassiulernerup nassataraa sulisut 16-17-isut 25-inik ilaneqarnerannik. Sulisut taakku tallimanngormat nerpinnik tunisassiornerup unitsinneqarnissaa tikillugu saarulliit nerpii ullormut 10 tonsit missingi tunisassiarisarpaat.

Abia Thorsteinsen oqarpoq Kangaatsimi imissaaleqisoqarnera pillugu sapaatip akunnera kingulleq Nukissiorfinniit paasitinneqarsimmallutik. Aamma novemberimi imissaaleqinerup aaqqiivigineqarsinnaanera naatsorsuutigineqartoq paasitinneqarsimapput.

Allattoq: Inga Egede, ineg@royalgreenland.com

Assit: RG Kangaatsiaq

Asseq

 
 

Royal Greenland aperiguk

i
Write the text from the image