- Naak qaammat ataaseq kingusinnaarluta aammalu teknikkikkut allatigulllu ajornartorsiutit arlaqartut piffissap ingerlanerani nalaattaraluarlutigik, isumaqarpunga ataatsimut isigalugu tunisassiorneq ingerlalluarsimasoq, Maniitsumi Royal Greenlandip tunisassiorfiani ingerlatsisoq Lisbeth Østergaard oqarpoq.

Maniitsup eqqaani bundgarnersorlutik saarullinnik aalisartut pisaannik uumatiinnarlugit aalisariutinik uumatitsiviusunik assartoriarlugit uumatsitivinni ullualuit uningateriarlugit tunisassiorfimmi aaverlugit tunisassiarineqarput. Tunisassioriaaseq nutaajusoq Maniitsumi Royal Greenlandip tunisassiorfiani siorna 2014-imi misileraalluni ingerlanneqartoq iluatsilluarmat ukioq manna annertusillugu ingerlanneqarpoq.

Majip naaneraniit oktoberip 22-iata tungaanut Maniitsumi tunisassiorfimmi tunisassiat ineriikkat 250 tonsit tunisassiarineqarput, taakkunannga 150 tonsit saarulllit nerpii immikkut pitsassusillit Nutaaq *Cod-imik taaguusikkat sinnerilu nalinginaasumik saarullit nerpiliaralugit kiisalu saarulliit qeritillugit blokkinut ilioqqakkat tunisassiarineqarput.

- Nutaaq*Cod-inik tunisassiorneq ingerlalluarpoq. Tunisassiat nerpii kusanarluinnarput pitsaalluinnartuullutillu, tunisassiorfiup ingerlatsisua oqarpoq.

Unammillernartut

- Ukiup sivisunera pissutigalugu tuniassiornermi atortorissaarutit atorneqartussat nutaat ikkussuunneqarnissaat kinguaattoormat unammillernarsimavoq. Kingusinnerusukkut aamma saarulliit uumasut inissisimaviani atortorissaarut aserormat aammalu kingusinnerusukkut aalisariut uumaatitsivik amutittariaqalernera aammalu ilaatigut piffissap ilaa sulisussaaleqisimaneq pissutigalugu aatsaat piffissap naggaterpiaatigut tunisassiorneq ingerlaavartoq ingerlalerpoq. Taamaattumik tunisassiarineqartut annertussusiat naatsorsuutigisamiit annikinnerusut tunisassiaraavut. Taamaakkaluartoq tunisassiat ullormut 26-27 tonsit naammassisinnaasarsimavavut, Lisbeth Østergaard oqarpoq nangipporlu:

- Ataatsimut isigalugu saarulliit uumasut tunisassiarineqarnerini sulisut immami nunamilu suliaminnut tunniusimallutik sulinerisigut suleqatigiilluarnikkullu ajunngilluinnartunik angusarissaartoqarsinnaasoq takutinneqartoq uanga isumaqarpunga.

Maniitsumi tunisassiorfimmi saarulliit uumasut tunisassiarineqarnerini sulisut 70-it 80-illu akornani sulisorineqarput. Septemberimi sulineq ingerlaavartoq ingerlalermat sulisut nutaat 50-it missingi sulisorineqalerput. Tunisassiorfiup ingerlatsisuata neriuutigaa Maniitsumi tunisassiorfimmi qalerallit nerpiinik tunisassiorneq aallartinneqarmat sulisorineqartut taakku sulisoriinnarneqarsinnaassasut .

Allattoq: Inga Egede, ineg@royalgreenland.com

Assit: RG

Asseq

 
 

Royal Greenland aperiguk

i
Write the text from the image