Raajat issittup imartaaneersut inuussutissarsiutaapput naleqarluinnartut, taamaattumillu kinguaariit tulliuttut avatangiisinik eriaginnillutik siunissami atuisussat eqqarsaatigalugit raajaqassutsip annikillinnginnissaata qulakkeerneqarnissaa pingaaruteqarpoq. Raajat issittup imartaaneersut nunarsuarmi tamarmi mamarineqaannaratik inuussutissaqarluaannaratillu nerisaasarput pingaarnertut aalisakkanit pissuseqatigiiaanit assigiinngitsunit arlalinnit imarmiuniillu.

Tamaattumik Kalaallit Nunaanni naalakkersuisut - aalisarnermut naalakkersuisoq Karl Kristian Kruse siulersortigalugu - raajarniarnerup ingerlanneqarnissaa pilllugu pilersaarut naapertorlugu aappaagu raajartassiissutigineqartussat annertussusissaat aalajangersarneqarnissaat pillugu siunnersuutaat Kalaallit Nunaanni suliffeqarfissuarnit angisuunit aalisarnermik aallutaqartunit marluusunit naammagineqarluinnarpoq. Raajarniarniarnerup ingerlanneqarnissaa pillugu pilersaarut naapertuinnarneqarnissaata pingaaruteqassusaa Royal Greenlandimit aamma Polar Seafoodimit isumaqataaffigineqarpoq - naak raajat amerliartornerat eqqarsaatigalugu raajartassiissutit annertusineqarnissaat ussernartoqaraluartoq. Tassa imaappoq, 2016-imi raajartassiissutigineqartut 12,5 %-iinnarmik tassa 9.000 tonsit missaannaanik annertusineqarput. 2016-imilu raajartassiissutigineqartut 2015-imut sanilliullugit annertunerupput, taakkualu 2014-imiit 2015-imut raajartassiissutigineqartut annikillineqarnerisa annertussusaannit annikinnerupput. Raajat issittup imartaaneersut aalisapilunneqarnissaat pinngitsoorniarlugu raajartassiissutigineqartussat annikillineqarnissaat uumassusilerisunit aalajangerneqarpoq, tamannalu Atlantikup Avannaata imartaani raajat navianartorsiunnginnerannik kinguneqartoq takuneqarsinnaalereerpoq.

Tamatumani akisussaassusilimmik politikkeqarneq raajat Kalaallit Nunaata imartaaneersut MSC-imik ilisarnaaqquserneqartarnerannut tunngaviulluinnarpoq, MSC-imi raajarniarneq nungusaataanngitsumik ingerlanneqartarnera pillugu soorlu ukiumut pisassiissutigineqartut annerpaamik 12,5 %-imik annertusineqarnerat atuisunut uppernarsaataammat.

MSC (Marine Stewardship Council) ingerlatsiviuvoq nunarsuarmut tamarmut siaruarsimasoq nungusaataanngitsumik aalisarneq nunarsuarmi tamarmi atuutsinneqarnissaanik tunngavissiuisartoq. MSC ingerlatsiviusoq namminersortoq, nunarsuarlu tamakkerlugu pinngortitaq pillugu suliniaqatigiiffimmit Verdensnaturfondenimit Unileverimillu 1997-imi pilersinneqarpoq. MSC-ip nungusaataanngitsumik aalisarneq ingerlatsilluarnikkullu aalisarneq pillugit maleruagassiai tunngavigalugit raajat Kalaallit Nunaata imartaaneersut MSC-imik 2013-ip aallartinnerani ilisarnaaqquserneqarput.

Asseq

 
 

Royal Greenland aperiguk

i
Write the text from the image