- Illumik unnuiffigineqarsinnaasumik pilersitsinitsigut neriuutigaarput aalisartut nunaqarfinni illoqarfinnilu allaneersut Aappilattumi Royal Greenlandip tunisassiorfianut tunisiartortalernissaat, Narsami tunisassiorfiup ingerlatsisua Niels Sakariassen oqarpoq.

Maanna illu ilaqutariinnut illutut sanaajusoq sisamanik initalik igaffilillu nutarterneqartussanngorpoq.

- Inuit arfineq pingasut illlumi unnuisinnaassapput. Neriuutigaarput qaammatip ataatsip iluani illu unnuiffigineqarsinnaalerumaartoq, Niels Sakariassen oqarpoq.

Tunisineq annertunerusariaqarpoq

Royal Greenlandip Aappilattumi tunisassiorfik siorna novemberip 14-iani ammarpaa.

- 2014-mi novemberimi Aappilattuni tunisassiorfik ammarneqarmalli maannamut aalisakkat 68 tonsit tunineqareerput, taakkuli tunisat annikippallaarput. Annertunerusumik qalerallit tunisaapput nunaqarfiup qanittuani saarulleqannginnera pissutigalugu saarulliit tunisaavallanngillat, kisiannili avasissumi saarulleqarluaraluarpoq. Aalisarfiusumi ukiumi 2015/16-imi aalisakkat 200 tonsit tunineqassasut anguniarparput, taamaattumik aalisartut amerlanerusut nunaqarfiup tunitsivianut tunisisarnissaat pisariaqarpoq, Niels Sakariassen oqarpoq.

Aalisartut nunaqarfinni illoqarfinnilu allaneersut Aappilattumi tunisisalernissaat aalisakkeriviup ingerlatsiuta neriulluarfigaa.

- Aalisartut nunaqarfinni illoqarfinnilu allaneersut Aappilattup eqqaani aalisarsinnaaneq tunisisinnaanermullu periarfissaqarnersoq apersuillutik ujartortarpaat, kisiannili aalisarfiup isorartunenera pissutigalugu tunuarsimaartarput. Taamaattumik maanna aalisartut Aappilattup eqqaanut aalisariartillutik unnuiffissaqartillugit maanna periarfissaqartileratsigit nuannaarutigeqaarput, Niels Sakariassen oqarpoq.

Aapilattumi Royal Greenlandip tunisassiorfiani quersuaq qeritsitiviutigisoq 70 tonsinik imaqarsinnaavoq. Tunisassiorfimmi sulisut pingasut sulisorineqaput.

Allattoq: Inga Egede, ineg@royalgreenland.com

Asseq: Nikolaj Benjaminsen

Asseq

 
 

Royal Greenland aperiguk

i
Write the text from the image