- Royal Arctic Linep umiarsua assartuisussaq Atammimmukartussaq kinguaattooqattaarmat tunisassiorfitsinni qui qerititsiviutigisoq ulikkaarmat saarullinnik killilimmik tigooraavugut, Atammimmi Royal Greenlandip tunitsiviani aqutsisoq Erik Hendriksen oqarpoq.

Royal Arctic Linep umiarsuaataa assartuut kinguaattooqattaarmat Atammimmi Royal Greenlandip tunisassiorfiani karsersuit ninngusuut – scantainerinik taaneqartartut 23-t assartugassat uninngasuutigineqarsimapput, tunisassiorfillu inissakimmat saarullinnik tigooraaneq killilersorneqarluni.

- Tunisassiorfimmi sulisut nalinginnaasumik 20-t missaani sulisorineqartarput, queeqqattali qerititsiviutigisup ulikkaaqqanera pissutaalluni suliassaqarpallaarnikuunngilagut, ullullu qulit kingulliit sulisut sisamaannaat sulisisoraavut, Erik Hendriksen oqarpoq.

Aaqqiissutaagallartoq

Atammimmi tunisassiorfimmi queeqqami qerititsiviutigisumi scantainerit aqqanillit inissaqartarput, qerititsivilli inissaarummat iliuuseqartariaqarsimapput.

- Queerarput qerititsiviutigisoq inissaarummat containeri 20 fodsi queeqqatut atortariaqalerparput, scantainerillu qerititsivitsinni inissaaruttut containerimut inissittariaqarsimallutigik, Erik Hendriksen oqarpoq.

Atammimmi tunisassiorfimmi sikuliorfiup atorsinnaanngikkallarnera sulinermut aamma unikaallatitsisimavoq. Erik Hendriksenip oqaatigaa iluarsaasussat tikereermata ulluni qaninnerni sikuliorfik aaqqineqassasoq naatsorsuutigalugu.

Royal Arctic Linep umiarsuaataa assartuut pingasunngorneq 23. september Atammimmut assartugassanik aallereermat Atammimmi Royal Greenlandip tunitsiviani sulineq nalinginaasumik ingerlaqqilerpoq.

Allattoq assiliisorlu: Nathan Kreutzmann, nakr@royalgreenland.com

Asseq

 
 

Royal Greenland aperiguk

i
Write the text from the image