Arnat marluk angutillu pingasut nunatta kujataaneersut Qasigiannguani tunisassiorfimmi atorfinitsinneqaqqammersut aallarnissaminnut piareeqqapput.

- Sulisortaassagut siusinnerpaamik sapaatip akunnerata tulliani aallarsinnaasut tikilluaqqunissaannut piareersimavugut. Angalanissaat Namminersorlutik Oqartussat Nuttartarnermut Aningaasaateqarfianit akilerneqarpoq, uagullu Qasigiannguani tikilluaqqujumaarpugut, sulisunullu iniutitsinni tamarmik immikkut iserterfissaqareerput, Suliffeqarfissuarmi sulisoqarnermut ingerlatsisoq Søren Olsen Damgaard oqarpoq.

Kalaallit Nunaata kujataaniit sulisussanik pissarsiniarneq sivisujaamik piareersarneqarsimavoq.

- Sapaatip akunnialui matuma siorna Kommune Kujallermi suliffissarsiuussisarfimmit nammineerluni Royal Greenlandimut saaffiginnittoqarpoq sulisussanillu neqerooruteqarluni, uagullu qujarutigeqaqarput. Tamatuma kingorna Qaasuitsup Kommunianeersut eqqartueqatigaagut, maannalu tamanut iluarusuutaasumik atorfinitsitsinerit piviusunngortissinnaalerpagut, Søren Olsen Damgaard oqarpoq.

Sulisunilli nutaanik tallimanik atorfinitsitsineq kisiartaanngilaq. Tamannami sioqqullugu sinerissami suliffissarsiuussisarfiit suleqatigalugit sulisut 20-t missaanniittut atorfinitsinneqarput, taakkunannga sisamat Qeqertarsuarneersuullutik, sisamat Sisimiunit, pingasut Nuummit kiisalu ataaseq Maniitsumit.

- Aamma maani illoqarfimmi allagarsiivugut, taamaasillutalu sulisut tallimat suliffissarsiuussisarfiit avaqqullugit pissarsiaraagut, taamaammat suleqatigiilluarsinnaasunik pissarsinerput qularutiginngilara, tunisassiorfimmilu sulinitta nanginnissaanut neriulluaateqalerlutalu nukissaneqqippugut. Sulisortaassagullu kujataaninngaanneersut tikilluaqqunissaannut qilanaarpugut, Qasigiannguani tunisassiorfimmi ingerlatsisoq Frank Hagen oqarpoq.

Sulisut nutaat kingulliit atorfinitsinneqarnerisigut Qasigiannguani tunisassiorfimmi sulisussanik amigaateqaqqikkallartoqarnavianngilaq.

- Pisassiissutissat pissutsillu allat tunisassiorfimmi tunisassiornermik unitsitseratarsinnaanerat apeqqutaatilugu sulisortaatta ukioq kaajallallugu Qasigiannguani suliffeqarsinnaanissaat naatsorsuutigaarput. Eqqaassallugulu pingaaruteqarpoq Qasigiannguani sulisunik ukiumi kingullermi angerlartitsinernik nalaataqarsimannginnatta, Søren Olsen Damgaard oqarpoq.

Allattoq: Káte Hansen, kaha@royalgreenland.com

Asseq: John David Eriksen

Asseq

 
 

Royal Greenland aperiguk

i
Write the text from the image