Qaanaami imeq septembarip aappaani misissorneqarmat saviminernik seqummakoqartoq paasineqarpoq. Taamaattumik Qaanaami innuttaasut suliffeqarfiillu kajumissaarneqarput imertunnginnerminni imermilluunniit nerisassiornermut atuinnginnerminni imeq sorujuiaqqaartassagaat.

Qaanaami imeq pillugu ajornartorsiuteqartoqarnera Royal Greenland A/S-imit arajutsineqanngilaq. Taamaattumik Qaanaami erngup saviminernik seqummakoqarunnaarnissaata tungaanut tunisassiassat Royal Greenlandip Qaanaami tunitsivianut septembarip aappaaniilli tunisat illikartinneqarlutillu pitsaassusilerneqassapput.

- Mattaat septembarip aappaaniilli tunisat tamaaviisa illikartippavut. Qaanaami erngup saviminernik seqummakoqarunnaarnissaata tungaanut mattaat tamarmik pitsaassusileqqissaarneqaqqissaartassapput, Royal Greenlandimi pitsaassusilerinermi suleqatigiiaat aqutsisuat Nauja Heiselberg oqarpoq.

Royal Greenlandip Qaanaami tunitsivia qilalukkap mattaanik taamaallaat juulip naaneranili tigooraavoq. Mattaat septembarip aappaanili kingullermillu septembarip aqqarngani tunisat katillugit 768 kiilut Qaanaami tunitsivimmut tunineqarput.

- Pitsaassusilereqqissaarnissap ingerlanneqarnissaanut periarfissat marluupput. Mattannik misissueqqissaarisinnaasumik Qaanaami pitsaassusilerisoqarpugut, tunisassiassalli Nuummut apuukkaangata aamma pitsaassusilerneqarsinnaapput. Tunisassiassat tunisaareersimasut aamma Qaanaami erngup saviminernik seqqummakoqarunnaartutut oqartussaasut nalunaaruteqarnissaasa tungaanut pitsaassusilerneqaqqissaartassapput, Nauja Heiselberg oqarpoq.

Qaanaami tunitsivimmi aqutsisup Imiina Avatannguup oqaatigaa Qaanaami imeq saviminernik seqummakoqarunnaarsimasutut nalunaarutigineqarnissaata tungaanut mattannik tunisisoqaraangat imeq sorujuiarneqartassasoq.

Allattoq: Inga Egede, ineg@royalgreenland.gl

Nutserisoq: Hanne Petersen

Asseq: RG

Asseq

 
 

Royal Greenland aperiguk

i
Write the text from the image