Foodfestivalimik aaqqissuussineq tallimmangornermiit sapaat ilanngulllugu ualikkut nalunaaqutaq ataatsimiit sisimat tungaanut nuummiunit tamanit ornigarneqarsinnaasoq Sermersuumi Inuussutissarsiornermut Siunnersuisooqatigiinnit aaqqissuunneqarpoq.

Aqagu tallimanngornermiit Royal Greenlandimi nunatsinni tunisassianik tuniniaavik Katuami tuniniaaveqarluni nerisassiornermi najoqqutassanik, tunisassiornermi ingerlatsinerit pillugit takutitassaqarluni aammalu nunatsinni tunisassianik sassaalliisoq ornigarneqarsinnaavoq.

- Tallimanngornermi Foodfestivalimik aaqqissuussinermi Royal Greenland qulaqutaritinneqartumi "Bussiness To Bussines"-ip peqataanermini Royal Greenlandimi tunisassianik tuniniaavimmi tunisassiarineqartartut nerisassiornermi igaffinni angisuuni soorlu kantiinani , neriniartarfinni aammalu suliffeqarfinni najoqqutarineqarsinnaasut takutinneqassapput. Aamma qaleralinnik qerisunik aammalu qaleralinnik aalarfigititanik ussiisoqarsinnaassaq. Taamatuttaaq tuniniaavitsinni Royal Greenlandimi tunisassiornerniit videonik takusassaqartitsissaagut, Royal Greenlandimi tunisassianik tuniniaavimmi akiginiaanermik suliaqartoq Kaassannguaq Zeeb oqarpoq.

Arfininngorpat Foodfestivalimi aaqqissuussinermi qulequtaritinneqarpoq "Kalaallit nerisassaataat takusakkit, naamakkit misilerarlugillu ". Ulloq tanna Royal Greenland Paarisa suleqatigalugu nunatsinni nerisassat peqqinnartuuneri pillugu saqqummiussaqassapput.

- Paarisa suleqatigalugu kalaalimerngit Royal Greenlandimi tunisassiarineqartut peqqinnartuuneri pillugit saqqummiussaqassaagut. Paarisamiit aamma "Nerisaqarnermut innersuussutit qulit" saqqummiunneqassapput, ilaatigut nerisat peqqinnartut aammalu nerisat peqqinnanngitsut sunniutaat pillugit saqqummiussissallutik, Kaassannguaq Zeeb oqaluttuarpoq.

Arfininngornermi Royal Greenlandip tuniniaaviani raajanik qallersukkanik aammalu eqalunnik aserortikkanik qallersukkanik sassaalliisoqassaaq.

Sapaammi saarullik pillugu saqqummiisoqarnerani ilaatigut Royal Greenlandimi tunisassialerinermi ingerlatsisoq Sten Sørensen Royal Greenlandimi tunisassioriaaseq nutaajusoq, "Nutaaq Cod", pillugu, tassalu saarulliit uumatsivimmiiteriarlugit nutaajutillugit Maniitsumi tunisassiorfimmi tunisassiarineqartartut pillugit saqqummiussissaaq.

Allttoq: Inga Egede

Assit: RG

Asseq

 
 

Royal Greenland aperiguk

i
Write the text from the image