Tunisassiassanik sineriammi tunisassiorfinniit Nuummut pilertornerusumik assartuineq, pisisartunut nioqqutissanik naammasseriikkanik pilertornerusumik nassiussisarneq minnerunngitsumillu amerlanerusunik pisisartoqalerneq kaaviiaartitat amerlanerunerannut pissutaapput.

- Ingammik qullukkat, saarulliit issimi panertitat, raajat, qalerallit pujuukkallu tunisaanerulerput. Taamaattumik soorlu qullukkat aamma saarulliit issimi panertitat tunisassiarisinnaasatta annertussusaannit massakkut annertunerupput, Nunatsinni tunisassianik tuniniaavimmi tuniniaasoq Ingo Hansen oqarpoq.

Kaaviiaartitat amerlanerulernerisa ilutigisaanik Nunatsinni tunisassianik tuniniaaviup quersuaani sulisut amerlineqarput, tamannalu immikkoortortap quersuarmi sulisutut ilinniagaqartunik ilinniartoqalersinnaaneranik kinguneqarpoq. Quersuaq massakkut pingasunik sulisoqarlunilu marlunnik ilinniartoqarpoq.

- Quersuatsinni qerititsiviutigisumi sullarissunik sulisoqarnerput pissutigalugu pisisartutsinnut aasap ingerlanerani pilertornerusumik aatsisinnaallutalu pilertornerusumik nassiussisarsinnaasimavugut. Taamaattumik tunisassiatta piumaneqarnerunerat pisisartunullu pilertornerusumik aatsisinnaasimanerput nassiussaqarsinnaasimanerpullu kaaviiaartitat amerlanerulernerannut tunngaviupput, Ingo Hansen oqarpoq.

Pisisartoqarnerulerneq

Nunatsinni tunisassianik tunisaqarnikkut 2012-imi 2013-imilu juulimi kaaviiaartitat 1 millioner koruunit missaaniipput, massa 2014-imi 2015-imilu 2 millioner koruuningajaasut.

Niuertarfiit soorlu Pilersuisoq, Pisiffik aamma Kalaallit Nunaanni Brugsenit Nunatsinni tunisassianik tuniniaavimmeersunik pisiortornerpaajusarput. Kisianni Nunatsinni tunisassianik tuniniaavik pisisartui ukiuni kingullerni amerliartorput.

- Tunisassiorfiutivut nunatsinni tunisassianik tunisassiorfiusartut amerlanerulinngillat. Taamatuttaaq kaaviiaartitat amerlanerulernerat tunisassiatta qaffasinnerusumik akeqalersimanerannik aallaaveqanngilaq. Tassami raajat akii nunarsuarmi niuerfinni qaffanneqarnerat pissutigalugu raajat akii kisimik qaffapput. Pisisartuvulli amerlanerulerput, tunisaqarnerunitsinnullu ilaatigut pissutaaqataapput. Illoqarfinni pisiniarfeeqqat namminersortut ilaatigut pisisartorilerpavut. Igaffissuaqarfiillu amerlanerusut soorlu neriniartarfiit, sullissiviit umiarsuillu pisisartorilerlugit, Ingo Hansen oqarpoq.

Royal Greenlandimi tuniniaanermi ingerlatsisup Malik Hegelund Olsenip Nunatsinni tunisassianik tuniniaaviup ingerlalluarnera naammagisimaarluinnarpaa.

- Suleqativut suleqatigiilluarnerput pillugu qutsavigaavut. Minnerunngitsumik tunisassiornermik suliaqartut, quersuarmi sulisut tuniniaasullu sullarinnerat pisisartutsinnullu pilertornerusumik sullissisarnerat pillugit qutsavigerusuppakka, Malik Hegelund Olsen oqarpoq.

Malik Hegelund Olsenip aamma oqaatigaa, Royal Greenlandip Nunatsinni tunisassianik tuniniaaviata ingerlalluarnerup tunisassianik nutaanik pisisartut kissaataat naapertorlugit ineriartortitsinikkut annertusinissaa anguniaraa.

Allattoq assiliisorlu: Inga Egede,ineg@royalgreenland.com

Asseq

 
 

Royal Greenland aperiguk

i
Write the text from the image