- Tunisassiorfimmi sulisoqarnerup tungaatigut ukioq manna ajornartorsiuteqarpugut. Tunisassiorfimmi sulisut ilaat aalaakkaasimanngillat sulinngitsoortarsimallutillu, taamaattumik suleqatigiiaat ullukkoortartut ataatsit taamaallaat sulisarput. Tamanna saarulliit nerpiinik ukioq manna tunisassiornitta siorna tunisassiornitsinnut sanilliullugu affaannarmik ingerlanneqarneranik kinguneqarpoq, Royal Greenlandip Paamiuni tunisassiorfiani ingerlatsisoq Ilannguaq Abrahamsen oqarpoq.

Suleqatigiiaanik marlunnik sulisoqarneq iluatsinngitsoq

Royal Greenlandip Paamiuni tunisassiorfiani tunisassianik qerinasuartitsisarfiusimasumi saarulliit nerpiinik tunisassiorneq 2012-imi aallartinneqarpoq. Saarulliit siorna tunisat affaat sinnerlugit nerpinngorlugit tunisassiarineqarput, tunisassiorfiulli ukioq manna tunisat affaat sinnerlugit qerinasuartippi.

- Saarulliit nerpiinik tunisassiornerup aallartinneqarani suleqatigiiaanik marlunnik - ullukkoortartunik unnukkoortartunillu - pilersitsivugut. Kisianni suleqatigiiaani ataatsini sulisut 30-usartussaammata aamma sulisut amerlassusaaa pingajorarterutaat amigaatigineqartarmata suleqtigiiaaneq marlunnik sulisoqarneq iluatsinngilaq. Taamaattumik suleqatigiiaat ataatsit taamaallaat aasaq naallugu sulipput. Oqaatigeriikkattut tamakkiisumik tunisassiorsinnaasimanngilagut, tamannalu pissutigalugu tunisat affaat sinnerlugit qerinasuartippavut, tunisassiorfimmi ingerlatsisoq oqarpoq.

- Suleqatigiiaanik marlunnik sulisoqarnerput ataavartumik ingerlannikuusimanera pissutigalugu saarulliit nerpiinik tunisassiorfimmi sulisut siorna 70-it missiliorpaat. Kisianni saarulliit nerpiinik tunisassiorfimmi sulisut ukioq manna 30-nnaapput qerinasuartitsinermilu sulisut aqqaneq-marluullutik. Suleqatigiiaanik arlalinnik sulisoqarluta siunissami tamakkiisumik tunisassiorsinnaaniarutta sulisussanik avataaniit tikisitsisariaqarpugut, Ilannguaq Abrahamsen oqarpoq.

Royal Greenlandip Paamiuni tunisassiorfia nipisat suaannik 100 grammikkaarlugit aamma 6,2 kiilukkaarlugit poortukkanik upernaap aallartinnerani siornatulli tunisassiorppoq. Tunisassiorfik nipisat suaat 30 tonsit missaat nutaajutillugit qerinasuartitatut ukioq manna tunisassiarai. Taamatuttaaq Paamiuni tunisassiorfik saattuartassiissutit tamakkerlugit aalisarneqarnissaata tungaanut saattuanik juunip tungaanut tunitsiviuvoq. Saarullinnik tunitsiviunerata saniatigut aalisakkanik pissuseqatigiiaanik allanik soorlu qaleralinnik suluppaakkanillu tunitsiviuvoq.

Allattoq: Inga Egede, ineg@royalgreenland.com

Asseq: RG

Asseq

 
 

Royal Greenland aperiguk

i
Write the text from the image