- Qasigiannguarmiut qanimut suleqatigisarakkit Qasigiannguani ulluinnarni inuuneq immikkut ittumik paasisaqarfigaara. Royal Greenlandip tunisassiorfiutaani sulilluni ajunngivippoq tunisassiorfimmilu suleqatigiilluartaratta tunisassiorfimmi sulinera nuannaraara, Sylvester Fodegaard Jønsson oqarpoq, taannalu tunisassiorfimmi ullaakkut arfinermiit ualikkut nal. 14:45-ip tungaanut sulisarpoq.

Inuusuttut Nordjobb aqqutigalugu suliartortut sulinerat tunisassiorfimmi qullersanit aamma nuannarineqarpoq.

- Inuusuttut Nordjobbimeersut feeriartoqarnerani iluaqutaalluinnarlutillu sulilluarput, Qasigiannguani tunisassiorfimmi ingerlatsisoq Hans Grønvold oqarpoq.

Misigisaqarluarneq

Sylvester Fodegaard Jønssonip, antropologitut Aarhus Universitetimi ilinniartuusup Qasigiannguaniinnini ilinniarnerminut atatillugu misigisaqarfigilluarpara.

- Tunisassiorfimmi sulinera sulinertuinnaq isiginngilara. Misigisat, ataatsimoorneq inuillu ullaaralaakkut makillunga suliartorusuttarninnut tunngaviupput. Ilinniartuugamalu aningaasartai aamma iluareqaakka, Sylvester Fodegaard Jønsson oqarpoq, ilanngullugulu oqaatigaa, Kalaallit Nunaanni kulturi inuillu pillugit ilisimasani annertunerulersimasut.

- Qasigiannguaniinninni paasivara Kalaallit Nunaat siuarsimasuusoq aamma inoqartoq Kalaallit Nunaata ajunngitsumik ingerlanissaa pillugu sulilluartunik. Kisianni Kalaallit Nunaanni kulturi pillugu allanik aamma paasisaqarpunga aamma uagut - danskit - kisitta Kalaallit Nunaat pillugu isummerneq ajortugut kisiannili kalaallit Danmark pillugu aamma isummertartut paasivara. Paasisarlu tamanna uannut pingaaruteqarluinnarpoq ilinniarnera eqqarsaatigissagaanni, Sylvester Fodegaard Jønsson oqarpoq, taannalu sunngiffimmini Qasigiannguup eqqaani pinngortitamiittarpoq alianaaqisumi.

- Qasigiannguanut tikikkama iluliarsuit imaani tissukartut takugakkit assut tupigusuppunga. Pinngortitarsuaq alianaalluinnartoq alutoraara. Taamaattumik sunngiffinni pinngortitamiittarpunga, pinngortitamiikkaangamalu qinnguserlunga pisuttuartarpunga arfernik allanillu takornarniarlunga. Aap, taamaattumik misigisanik nutaanik nassataqarluarlunga Kalaallit Nunaannniit angerlamut aggustip 31-ani aallassaanga.

Inuusuttut Nordjobb aqqutigalugu suliartortut Findlandimeersut, Sverigemeersut, Norgemeersut Danmarkimeersullu Qasigiannguani sulinerminni inissaqarniarnerat Royal Greenlandimit isumagineqarpoq.

Allattoq: Inga Egede, ineg@royalgreenland.com

Assit: Hans Grønvold

Asseq

 
 

Royal Greenland aperiguk

i
Write the text from the image