- Ukioq manna sikunnginnera pissutigalugu Royal Arctic Linep assartuutaata Kangaatsiani aamma nunaqarfinni Niaqornaarsummii Ikerasaarsummiilu quersuarni uningasuutivut assartorsinnaasimavai. Taamalilluta ukioq manna ingerlaavartumik tunisassiorsinnaasimavugut. Januarip aallaqqaataaniit apriilip aallaqaataa tikillugu saarulliit tarajortikkat aamma saarulliit qerititat katillugit 348 tonsit tunisassiaraavut siorna ukiup taamaalinerani 229 tons tunisassiaralutigik, Kangaatsiani Royal Greenlandip tunisassiorfiani ingerlatsisoq Abia Thorsteinsen oqarpoq.

Ingerlaavartumik tunisassiorput

Niaqornaarsummi tunitsiviup ingerlatsisua Judithe Wille oqarpoq Niaqornaarsummi quersuup ulikkaarnera pissutigalugu marsip naanerani tunisineq tunisassiornerlu unittaraluartoq.

- Ukioq manna quersuarmi uningasuutitta ilanngarneqartarneri pissutigalugu tunisineq tunisassiornerlu unitsinneqanngillat. Sulisuvut ullut tamaasa ingerlaavartumik ullormut saarulliit tarajortikkat tonsit tallimat arfinillilluunniit tunisassiarisarpaat. Tassa quersuarni inissaaruttoorneq pissutigalugu ukioq manna aalisartut tunisinerat aammalu sulisut sulinerat unitsinneqanngilaq, Juditeh Wille oqarpoq.

Taamatuttaaq Ikerasammi aalisartut tunisassiorfimmi sulisut sikunnginnera iluaqutigaat.

- Sivikitsuinnarmik sikusaraluarpoq kisianni ukiup annersaa sikuunngilaq. Sikunnginnerata nassatarisaanik Ikerasaarsummi aalisartut ingerlaavartumik tunisisarput taamatuttaaq sulisut 15-it missingi saarullinnik tarajorterillutik nipisat sualerisussaanerput pissutigalugu ipaassaq saarullinnik tunisinerup unitsinneqarnera tikillugu suliassaqartuarsimapput, Ikerasaarsummii tunitsviup ingerlatsisua Lars Karslen oqarpoq.

Taamatuttaaq Kangaatsiami tunisassiorfik quersuarmi inissaarunneq pissutigalugu matuneqarallarnani saarullinnik qerititerilluni tunisassiorpoq.

- Ukioq manna tunisineq matunngilaq, sulisut suliassaqarnerput naapertorlugu tallimat amerlanerusulluunniit sulisoralugit saarullinnik qerititerilluta tunisassiorpugut, Abia Thorsteinsen oqarpoq.

Kangatsiami Royal Greenlandip tunisassiorfia upernaaq manna nipisat suaannik tunisassiortoqareernerani saarullinnik tisaanik tunisassiorluni aallartissaaq

Royal Greenlandip Attumi tunitsivia saarullinnik issimut panertiterilluni tunisassiortoq nipisat suaannik tunisisoqarnerata nalaani aalisakkanik tigooraassanngilaq.

Allattoq: Inga Egede, ineg@royalgreenland.com

Assit: Judithe Wille, Lars Karlsen

Asseq

 
 

Royal Greenland aperiguk

i
Write the text from the image