Kujataani Narsamiit avannaani Qeqertarsuaq tikillugu Royal Greenlandip tunisassiorfiinut nipisannik tunisisoqarsinnaassaaq.

Nipisanniarnermi Nunatta Kitaani aqutsiveqarfiit arfineq marluupput, taakkunanngalu aqutsiveqarfik 1F –imi , tassa kujataani Nanortallup eqqaaniit Qaqortup avannaatungaani nunaqarfimmi Qassimiut tikillugu aalisartut nipisat suaat pisassiissutigineqartut katillugit 114 tonsit majip 20-iata tungaanut tunisinnaavaat. Aqutsiveqarfinni ataasikaanni pisassiissutigineqartut aalisartut pisarissanngikkaluarpatigik pisassat aqutsiveqarfimmut allamut ingerlatinneqarsinnaassapput. Pisassiissutigineqartulli piffisssaliussap iluani pisarineqassappata nipisanniarneq unitsinneqassaaq.

2015-imi pisassiissutigineqartut ilaannai pisarineqarput

Aqutsiveqarfinni arfineq marluusuni 2015-imi nipisat suaat katillutik 1500-it pisassiissutigineqartunit 1000 -it tunineqarput. Aqutsiveqarfimmi 1F-imi, tassa Nunatta kujataani 2015-imi nipisat suaat 66 tonsit tunineqarput.

Kujataani Royal Greenlandip tunisassiorfiini Narsami tunisassiorfik nipsat suaanik kisimi tunitsiviuvoq. Narsami tunisassiorfiup ingerlatsisua oqarpoq ukioq manna nipsat suaannik tunisineq isumalluarfigivallaarnagu.

- Siorna nipisat suaat nappartat 160-it tassalu 23 tonsit missingi tunisassiaraavut. 2014-imi nappartat 155 –it tunisassiaralutigik. Narsap eqqaani kassoqartorujussuunera pissutigalugu maani aalisartut nipisanniarnissaq eqqarsaatigalugu isumalluarpallaanngillat, Narsami Royal Greenlandip tunisassiorfiani ingerlatsisoq Niels Sakariassen oqarpoq.

Aqutsiveqarfinni assigiinngitsuni aalisartut peqatigialugit aalisartut kattuffiisa sumiffinni ataasiakkaani nipisanniarneq qanoq ilinerani aallartissanersoq aalajangertarpaat. Aamma pisassat pisarineqanngitsut aqutsiveqarfinnut sorlernut ingerlateqqinneqassanersut aalisartut kattuffiisa aalangertarpaat.

Aqutsiveqarfimmi 1E-mi, tassalu Arsuup Paamiullu eqqaani nipsisanniarneq apriilip 15-iani aallartissaaq aqutsiveqarfimmili 1D-mi, tassalu Qeqertarsuatsiaani aamma Nuummi nipisanniarneq apriilip ulluisa 11-ani aallartissaaq.

Allattoq: Inga Egede, ineg@royalgreenland.com

Assit: RG

Asseq

 
 

Royal Greenland aperiguk

i
Write the text from the image