Siorna nipisat suaat nutaajutillugit qerititat 60 tonsit Paamiuni tunisassiorfimmi tunisassiarineqarput. Taakku 100 grammikkaarlugit, kiilukkaarlugit aammalu 6,2 kiilukkaarlugit poortorneqarlutik qeritinneqarput. Ukioq manna Paamiuni tunisassiorfimmi nipisat suaat nutaajutillugit qerititat 35 tons tunisassiarineqassapput.

Pisisartut mamarisaat

- Ukioq manna nipisat suaat nutaajutillugit qerititat 35 tonsit Paamiuni tunisassiorfimmi tunisassiarineqassapput. Taakku 100 grammikkaarlugit aammalu 6,2 kiilukkaarlugit poortorneqassapput, Royal Greenlandimi tunisassiornermi ingerlatsisoq Niels Wann oqarpoq.

100 grammikkaarlugit poortukkat pisiniarfissuarni neriniartarfinnilu pisisartunut tulluussakka aammalu 6,2 kiilukkaarlugit poortukkat Japanimi pisisartunut tulluussagaasut ukioq manna tunisassiarineqassapput.

-Nipisat suaannik nutaajutillugit qerisunik annikinnerusunik tunisassassiornissaq tunisassiat akiginiarnerisa naatsorsuutigisamiit ajornakusoornerusimanerannik pissuteqarpoq. Aamma suaat assiginngitsunik mamassusilerlugit akuukkat Japanimi tuniniaavinni tunineqarnerisa suli ineriartortinneqarnerat tunisakinnerunitsinnut pisssutaaqataavoq. Pisisartut mamarisaannik tunisassiorsinnaanerup qulakkeernissaanut piffissaq sivisusinnaasarpoq, Niels Wann nassiuaavoq.

Nipisat suaat nutaajutillugit qerititat pisiniarfissuarni neriniartarfinnilu pisisartunut tulluussakkat 100 grammikkaarlugit poortukkat aammalu Japanimi pisisartunut tulluussarlugit 6,2 kiilukkaarlugit poortukkat ukioq manna tunisassiornermi aallunneqassapput.

- Siorna Danmarkimi pisisartunut neriniartarfiutilinnullu tulluussarlugit kiilukkaarlugit poortukkat aamma tunisassiaraavut. Kisiannili kiilukkaarlugit poortukkat nerisassiornermi igitsisariaqarsinnaaneq eqqarsaatigalugu angivallaarsimapput, mannalu paasinarsivoq pisisartut 100 grammikkaarlugit poortukkat naammagisimaaraat, Niels Wann oqarpoq.

Periarfissat

Royal Greenlandip nutaanik pisisartoqalernissani sulissutigiuarmagu nipisat suaannik nutaajutillugit qerititanik annertunerusunik Paamiuni tunisassiorfiup kingusinnersukkut suliakkerneqarsinnaanera matunneqanngitsoq Niels Wannip oqaatigaa.

- Royal Greenlandip tunisassiorfii allat aamma nipisat suaannik tunisassiulersinnaanerat mattunneqarsinnaannngilaq, ingammik Japanimi tunisassiarineqalersut iluatsissappata. Kisianni nipisat suaannik tunisassiornermi atortorissaarutinik Paamiuni tunisassiorfik peqareernera pissutigalugu siulliunneqassaaq, Niels Wann oqarpoq, nangipporlu:

- Nipisat suaat Kalaallit Nunaanersoq MSC-imik nalunaaqutserneqareerput, tamannalu MSC-imik nalunaaquteqarsimasunik nunat pisiumasut pisinerunissaannik ammaassivoq.

Nipisat suaannik nutaajutillugit qerititanik tunisassiornermi sulisut qulit 15-illu missaat sulisorineqassasut Paamiuni Royal Greenlandip tunisassiorfiani ingerlatsisup Ilannguaq Abrahamsenip oqaatigaa.

Aqutsiveqarfik 1E-mi tassa Arsummi Paamiunilu nipisanniarneq aprilip 15-iani ammassaaq.

Aqutsiveqarfik 1E-mi nipisat suaat pisassat 165 tonsiupput, taamaattumik nipisat suaat Paamiuni tunisassiorfimmut tunineqartut annertuut nappartanut poortortorneqassapput.

Allattoq: Inga Egede, ineg@royalgreenland.com

Foto: RG

Asseq

 
 

Royal Greenland aperiguk

i
Write the text from the image