- Nioqqutissiassanik igitsisariaqalerumanata ippassaq sisamnngornermi ullaakkut aalisartut nalunaarfigaavut tunisineq unikkallartariaqarmat bundgarniminnik amoorereersimanngikkunik ammoreqqunagit, Sisimiuni Royal Greenlandip tunisassiorfiani tunisinermi aqutsisoq Lars Berthelsen oqarpoq

Sisimiut eqqaani bundgarnersorluni aalisarneq sapaatit akunnerit marluk matuma siorna aallartippoq. Aallartinneraniit umiatsiaarasorlutik aalisartut 30-it missingi aalisariutillu tallimat Sisimiuni Royal Greenlandip tunisitsivianut aamma Sarfannguani bundgarnersorluni aalisarfiusup qanittuaniittumut tunisisarput.

Saarullippassuit

- Sarfannguit eqqaani saarullippassuaqarpoq. Aalisartut Sisimiuni tunisassiorfimmut aammalu Sarfannguanut pisaminnik annertuunik tunisisarput, taamaattumillu aamma Sarfannguani tunisineq killilersorneqalereerpoq. Aalisartut aalisarluarput annertuunillu tunisisarlutik, taamaattumik saarulliit nerpiinik saarullinnillu qerititserilluta tunisassiornerput angummassinnaanngimmat saarullinnik tunisineq unitsikkallartariaqarparput, Lars Berthelsen oqarpoq, nangipporlu:

- Aaqqiissutaasinnaasumik ujartuilluta aalisartut killilimmik tunisisinnaalernissaat pilersaarusiorneqarpoq. Tunisassiorfimmi aqutsisut aammalu aalisartut sinnissaat Sisimiuni Sarfannguani tunisasssiorfinnut killilimmik tunisisalernissaat pilersaarusiorlugu sapaatiuppat ataatsimeeqqissapput, Lars Berthelsen oqarpoq.

Sisimiuni Royal Greenlandip tunisassiorfia raajanik, saattuanik aammalu nipisat suaannik tunitsiviusartup saarullinnik tunisassiornermi paarlagiiaannik sulisunik marlunnik pilersitsinissamut maannakkorpiaq sulisussaaleqivoq.

- Saarullinnik tunisassiornermi sulisunik paarlagiiaanik s marlunnik pilersitsinniaraluarpugut, kisiannili sulisussaaleqivugut, Lars Berthelsen oqarpoq.

130-it sulisorineqarput

Sisimiuni Royal Greenlandip tunisassiorfiani mannakkorpiaq 130-it missaanik sulisoqarpoq. Inuit 35-it saarullinnik tunisassiornermi sulipput, inuit 60-it missingi paarlagiiallutik raajaleripput allalli inuit 15-it missingi saattualerillutillu nipsat sualeripput.

Sisimiuni Royal Greenlandip tunisassiorfiani ullormut saarulliit25 tonsit tunisassiarisinnaavai tunisassiallu 1600 tonsit quersuarmi qeritsiviutigisumi uningasuutigineqarsinnaapput. Sarfanngauani tunisassiorfimmi saarullinnik tarajorterillutillu qerititerisarput, tassani tonsit 80-it uninngasuutigineqarsinnaapput.

Itillimi Royal Greenlandip tunisassiorfiani nalinginnaasumik saarullinnik tarajortiterillutik tunisassiortarput, maannali nipisat suaannik tunisinerup nalaani tarajorterineq uninngagallarpoq.

Allattoq: Inga Egede, ineg@royalgreenland.com

Asseq: RG

Asseq

 
 

Royal Greenland aperiguk

i
Write the text from the image