Sermitsiami ullumi saqqummersumi allaaserisami Royal Greenlandi “atorfininnermut isumaqatigiissutinik titarnernik marlunnik annertussusilinnik” atuisartutut pisuutinneqarpoq. Allaaserisaq pingaarnertut allaaserisamik malitseqartinneqarpoq. Royal Greenlandip pisuutinneqarnini sakkortunerpaamik akerlilerpaa, taamaammallu eqqunnginneraanermik nalunaaruteqarluni.

Sermitsiami ullumi saqqummersumi ”atorfininnermut isumaqatigiissummik titarnernik marlunnik annertussusilimmik” atorfeqartumut illersuutaanngilluinnartumik allaaserisaqarpoq. Tamannalu naammaginagu aviisi pingaarnertut allaaserisamik malitseqartitsilluni ilaartuivoq.

Royal Greenlandimi tupigutsattoqarpoq, tassami ”atorfininnermut isumaqatigiissut titarnernik marlunnik annertussusilik” sulisup atorfininnerminut isumaqatigiissutiginngilaa. Allakkiarli tassaaginnarpoq sulisuusup Royal Greenland Pelagicimi sulisuuneranut uppernarsaat. Allakkiaq sulisuusup aningaaserivimmi taarsigassarsinissaanut atugassatut uppernarsaataavoq. Allakkiaq atorfininnermi isumaqatigiissummut attuumassuteqanngilaq.

”Atorfininnermut isumaqatigiissut titarnernik marlunnik annertussusilik” aviisip allaaserisanik tunniussinissaanut piffissaliussaa nalunaaquttap akunneri pingasungajaat sioqqullugit Royal Greenlandip pissarsiaraa, tusagassiortorlu allappoq tunniussinissaminut ullup qeqqanut piffissaqarluni, piffissaliunneqartullu iluani Royal Greenlandi akissuteqanngippat allaaserisaq saqqummiunniarlugu, aammalu allanniarluni Royal Greenlandi akinissaanut periarfissinneqarsimasoq. Tusagassiortoq ilisimatinneqarpoq, piffissaliunneqartoq sivikippallaartoq, tamannali soqutigingaarsimagunanngilaa, tassami allaaseriaq ajoraluartumik saqqummiunneqarpoq – tassalu saqqaani aammalu pingaarnertut allaaserisami.

Naliliinerput tunngavigalugu aviisip oqaluttuaq sapaatip akunnerata tullianut utaqqissussimasinnaagaluarpaa. Tusagassiortormi ilisimatinneqareerpoq, Royal Greenland Pelagic nalinginnaasumik atorfininnermut isumaqatigiissuteqartartoq. Royal Greenlandi Kalaallit Nunaanni 1200-t sinnerlugit sulisoqarpoq, sulisunullu ataasiakkaanut isumaqatigiissutit pillugit nalunaaquttap akunnerisa pingasut ingerlanerinnaanni qanoq isinikkulluunniit nassuiaateqarnissatsinnut naammattunik sulisoqanngilagut.

Taannaannaanngilarli. ”Atorfininnermut isumaqatigiissut titarnernik marlunnik annertussusilik” aviisimiittunit misissorneqarsimasuuppat paasisimassagaluarpaat atorfininnermut isumaqatigiissutaasinnaanngitsoq, allakkiamimi ulluliisimanerit erseqqissumik takutippaat atorfininnermut isumaqatigiissutip ullulerneqarnera aammalu tamatuminnga uppernarsaanerup ullulerneqarnera.

Naggataatigullu. Aviisimiittut misissuinerulaarsimasuugunik aamma paasisimassagaluarpaat suliaq atorfilimmut pineqartumut tunngasoq inuttaa ilisimateqqaanguarnagu Sermitsiaq aqqutigalugu avammut saqqummiunneqartussaasoq.

Taama peqqissaarussinngitsigisumik tusagasseeriaaseq, tassalu saqqaliussatigut uippallertitsiniaalluni amigaateqaqisumik pisimanngitsumilluunniit misissuisimaneq, sivikippallaamik piffissaliisimaneq aammalu ileqqorissaarnernik nalinginnaasunik malinninngitsumik ingerlatsineq Royal Greenlandimit akuersaarsinnaanngilluinnarparput.

Asseq

 
 

Royal Greenland aperiguk

i
Write the text from the image