Pikkorissartut 20-isut akornanni peqataasut 15-it Upernaviup nunaqarfiineersut Royal Greenlandimi HR-imi siunnersortimit Adolf Egedemit aammalu Royal Greenlandimi suliffeqarfimmi avatangiisinut siunnersortimit Carl Hansenimit Upernavimmi pikkorissartinneqarput.

Ilisimasaqalerpoq

Pikkorissartut ilaat, 30-inik ukiulik Johannes Petersen ulluinnarni Kullorsuarmi Royal Greenlandip tunisassiorfiani tunisanik suliaqartoq oqarpoq nammineq iliuuseqarnikkut qanoq sulifimmi pikkorinnerulersinnaanini aamma ulluinnarni suliffimmi pissutsit pitsaanerusut qanoq anguneqarsinnaanersut pillugit paasisaqarluni.

- Ileqqunik inooriaatsimullu allannguineq pillugu pikkorissarnitsinni qanoq inuttut pissuserisakka ulluinnarni suliffimmi qanoq sunniuteqartigisarnersut paasisaqarfigaara. Paasivara pissuserisakka suleqatinnut aamma ulluinnarni sullitannut aalisartunut suliniuteqartartut, taamaattumillu suliffinni ammanerusariaqarlunga aammalu suliffinnut tunniusimanerusariaqarlunga paasivara. Aamma pilersaarusiorlunga anguniagaqarlungalu sulinikkut ulluinnarni sulininni angusaqarluarnerusinnaallunga paasivara. Pikkorissarnermi pissarsiaqaqaanga aamma suliffima avataatigut atorluarsinnaasannik, Johannes Petersen oqarpoq, nangipporlu:

- Ikueqqaarneq pillugu pikkorissartinneqarnerput assorsuaq aamma pissarsiaqarnarpoq, suliffimmi ajutoortoqassagaluarpat iluuserineqartussat ilisimasaqarfigilerpakka.

Johannes Petersen ukiut arlaqartut suliffissaaleqereerluni Royal Greenlandimilu taartaasartutut sulisartareerluni siorna aggustusimi aalajangersimasumik Royal Greenlandip tunisassiorfiani tunisinermi suliaqalersoq Upernavimmi pikkorissartitsisoqarnerani Kullorsuarmi suleqatinilu peqataapput.

- Ulluinnarni tunisassiorfimmi suliffitsinni suleqatigiilluarpugut, kisiannili pikkorissarnermi peqataanini suliffimmi pissutsit sutigut suli pitsaanerulersikkumallugit uanga qanoq iliuuseqarsinnaanerlunga paasisaqarfigaara. Pikkorssarnitsinni suliffeqarfissuarmi suleriaatsit aamma paasissutissiissutigineqarmata qujamasuutigaara peqataatinneqarama, ilisimalikkammi siornatigut ilisimanngisakka pikkorissartinneqarnitsinni paasisaqarfigaakka, Johannes Petersen oqarpoq.

Allattoq: Inga Egede, ineg@royalgreenland.com

Assit: RG

Asseq

 
 

Royal Greenland aperiguk

i
Write the text from the image