- Tunisassiorfimmi aamma quersuarmi qeritisiviutigisumi natit iikkallu aserfallassimanerat pissutigalugu iluarsartuussineq ingerlattariaqarsimavarput, taamaattumik tunisassiorfik decemberip qulinganili matoqqanikuuvoq, kisianni sapaatip akunnerata tulliani tunisassiorfik ammaqqissaaq, Kangaatsiami Royal Greenlandip tunisassiorfiani ingerlatsisoq Abia Thorsteinsen oqarpoq.

Kangaatsiami tunisassiorfiup matoqqanerani aalisartut nunaqarfinni Attumi, Niaqornaarsummi aamma Ikerasaarsummi pisaminnik tunisinissaminnut periarfissaqarput.

- Ukiup qanoq ilinera pissutigalugu piffissami kingullermi aalisarneq ingerlanneqarpallaanngilaq. Aalisartut amerlanerit qilalugarniarput, taamattumik tunisassiorfiup matoqqanera piffissami kingullermi aalisartunut annertunerusumik sunniuteqanngilaq. Kangaatsimi tunisassiorfiup matoqqanerani aalisartut nunaqarfinnut tunisinissaminnut periarfissaqarput, Abia Thorsteinsen oqarpoq.

Sulisut inuit tallimat qulillu akornanni

Upernaaq maajimi Kangaatsiami tunisassiorfimmi saarullinnik tisaanik tunisassiorneq nutaatut aallartinneqarpoq, kisiannili illoqarfimmi imissaaleqineq pissutigalugu oktoberimi saarullinnik tisaanik tunisassiorneq unitsinneqartariaqarsimavoq.

Taamanikkut sulisut 20-t angerlartiinnartariaqarsimapput sinneri inuit tallimat qulillu akornanni amerlassuseqartut aalisakkat tulaanneqartunik saliillutik qerititerinermilu suliaqarlutik suliinnartut. Taakku sulisut inuit tallimat qulillu akornanni amerlassuseqartut tunisassiorfik ammaqqippat sulileqqissapput.

- Sapaatip akunnerata tulliani tunisassiorfik ammaqqippat sulisut tallimat qulillu akornanni amerlassuseqartut sulisoreqqilissavavut. Kisiannili tulassaat annertussusiat apeqqutaatillugu sulisoqartaratta maannakkut oqaatigisinnaanngilara qasserpiaat sulilerumaarnersut, sila apeqqutaajumaarpoq, Abia Thorsteinsen oqarpoq.

Illoqarfimmi erngup aqqutaa suli aaqqinneqanngimmat Abia Thorsteinsenip naatsorsuutigaa aatsaat aasaru saarullinnik tisaanik tunisassiorneq aallarteqqinneqarumaartoq.

Kangaatsiami tunisassiorfimmut saarulliit, qalerallit, qeeqqat aamma suluppaakkat tulaanneqartarput.

Allattoq: Inga Egede, ineg@royalgreenland.com

Asseq: RG

Asseq

 
 

Royal Greenland aperiguk

i
Write the text from the image