- Ukioq 2015 Paamiuni tunisassiorfik tunisassiorluarpoq. Tunisassiat nutaat tunisassiarineqalermata sulisut amerlipput tunisassiorfillu ingerlalluarnerulerluni, Paamiuni Royal Greenlandip tunisassiorfiani ingerlatsisoq Ilannguaq Abrahamsen oqarpoq.

Tunisassiorfimmi ingerlatsisup aamma oqaatigaa ukioq 2015 ukiup siulianut sanilliullugu suliassaqarfiunerusimasoq. Siorna upernaakkut tunisassiorfik nipisat suaannik tunisassiulerpoq juunimilu saarulliit nerpiinik tunisassiorneq aamma aallartilluni.

- Ukiakkut suliassat nalinginnaasumik annikillisarput, siornali kilisaatit septemberimiit decemberip tungaanut saarullinnik tunitsivimmut tunisisarput. Taamaattumik tunisassiorfimmi sulisut 30-nik amerlivavut, tassa katillugit 130-t sulisorilerlutigik, Ilannguaq Abrahamsen oqarpoq.

Ukioq ilikkagaqarfiulluartoq

Ilannguaq Abrahamsen 2014-imi oktoberimi Paamiuni tunisassiorfimmi ingerlatsisutut atorfinippoq, sulinerminilu unammilligassaqarsimanini isertuutinngilaa. Taammattorli ukioq 2015 naammagisimaarnartutut nalilerpaa.

- Paarlakaallutik suleqatigiiaat marluk 25-nik sulisullit ingerlaavartumik paarlakaallutik sulisinniarlugit unammillernarsimavoq. Kisiannili tunisassiorfiusoq ukioq 2015 ataatsimut isigalugu ajunngilluinnartumik ingerlavoq ilinniarfiullunilu aamma tunisassianik nutaanik tunisassiuleratta. Sulisut aqutsisullu suleqatigiilluarpugut aamma suleqatigiinnerput nukittunerulerpoq. Neriuutigaara suleqatigiilluarnerput 2016-imi ingerlaannarumaartoq, Ilannguaq Abrahamsen oqarpoq.

Paamiuni Royal Greenlandip tunisassiorfia aamma saattuanik tunisassiortarpoq.

Allattoq: Nathan Kreutzmann, nakr@royalgreenland.com

Assit: RG

Asseq

 
 

Royal Greenland aperiguk

i
Write the text from the image