Inuusuttut pingasut 20-niit 25-nik ukiullit piukkunnarseruttornerit Nordjobb aqqutigalugu aasaanerani suliniarlutik Kalaallit Nunaanni avinngarusimanerpaaliarniarlutik kissaateqarsimapput. Royal Greenlandip Upernavimmi tunisassiorfiani sulisimalereerput ullumikkullu pingasunngornermi Nutaarmiunut ingerlaqqissapput. Nutaarmiut Kalaallit Nunaanni Naatsorsueqqissaartarfiup kisitsisaatai naapertorlugit 2016-imi 32-inik inoqarpoq.

- Angutit inuusuttut pingasut Kalaallit Nunaanni avinngarusimanerpaaliarnissaminnut qilanaarsimaqaat qaqugulu ingerlaqqinnissartik apersuutigisarpaat. Maannalu Upernavimmi tunisassiorfimmi tunisassiornermut sungiusareeramik aallarsinnaanngorput, Flemming Andersen Upernavimmi pigisaanilu tunisassiornermi ingerlatsisoq oqarpoq.

Inuusuttut Nordjobb aqqutigalugu suliartortut junip naajartulernerani tikikkamilli Upernavimmi tunisassiorfimmi sulisimapput, nunatsinnullu suliartornertik aggustip naajartulernerani septembarillu aallartilaarnerani naggasissavaat.

Royal Greenlandip Nutaarmiuni tunisassiorfiani sulisut 15-it tungaannut amerlassuseqarput, inuusuttullu Nordjobbimeersut qaleralinnik qerititerinermik ikiuutissapput.

Nordjobbimeersunik sulisoqalerneq qanoq iluaqutissartaqarpa?

- Inuusuttut nakimaaqaat sulerusussuseqarlutillu. Ullut tamaasa sulisarput, aasaaneranilu aningaasarsiorniarlutik maannarput, tamannalu uatsinni sulisussaaleqisuni iluaqutaavoq, tassami sulisut aalajangersimasut ilaat aasaanerani suliartunngitsoortaramik, Flemming Andersen oqarpoq.

Nordjobbilu aqqutigalugu suliartortunik pingasunik atorfinitsitsineq ajornartorsiorfiulaarsimavoq.

- Aatsaat siullerpaamik Nordjobbimik suleqateqalerpugut, taamaammallu akissarsiassaqartitsinerup aammalu akileraarnermut allagartaqartitsiniarup allaffissornermut tunngasortai aallaqqaammut ajornartorsiortitsilaarsimapput. Taamaakkaluartorli misillinngilagut, Nordjobbilu aqqutigalugu aappaagu 15-it angullugit sulisoriniarniarpagut, tallimakkaarlugit nunaqarfinni inissaqartitsiffigilluakkatsinni aqquataarniassatsinnik, Flemming Andersen oqarpoq.

Aamma Kangaatsiarmiut marluk aasaanerani suliartortussat Royal Greenlandip qaleralleriffiani sulisussat aqagu Innaarsunnut tikissapput.

Allattoq: Káte Hansen, kaha@royalgreenland.com

Asseq: RG Upernavik

Asseq

 
 

Royal Greenland aperiguk

i
Write the text from the image