Stephen Hansen 16-iinnarnik ukioqarluni Qasigiannguit tunisassiorfianni taamanikkut KGH-p ingerlatarisimasaani sulilerpoq. Suliffia kingorna ilaatigut atertaarpoq Proeks, KTU naggataatigullu Royal Greenlandinngorluni. Taamaasilluni Stephenip Qasigiannguani tunisassiorfik inuunermini kisiat suliffigisimavaa. Eqqaamavaa aallarteqqaarami illoqarfik ingerlalluarsimaqisoq.

- Raajaleriffiusimasoq taamani sulileqqaarfigaara, taamani inuit sinerissamiit raajaleriffimmut suliartorlutik tikerartarallarmata. Taamani sulinermi pissutsit allaaqaat, kukkuluttorsimagaangattalu ilinniutaaginnartarput, Stephen eqqaamasalikkersaarpoq.

Stephen quersuarmi sulisuujuarsimavoq, raajanik qerisunik tunisassiassat nakkutigisaralugit. Saniatigullu raajanik aassiinerup eqqortumik ingerlanneqarnissaa nakkutigisarisimavaa. Ullumikkut tunisassiorfiup qalerallerivinngorsimanerani suli quersualerisuuvoq poortuutissanik, sulinermi atisanik assigisaannillu nakkutiginnittuulluni.

- Taamani aallartikkama assaannarmik allattuilluta nalunaarsuisarpugut, ullumikkulli nalunaarsuisarnerit tamarmik qarasaasiaq atorlugu ingerlanneqartarput, tunisassiassap tunisassiorfimmut tulaanneqarneraniit tunisassiap qerititsivimmi uninngasuutigineqalernerata tungaanut titarneeralersuutit atorlugit seqersittaatit atortorineqarlutik. Assaannarmik allattuisarallatta pisariusarpoq. Ullumikkulli qarasaasiami toortaalaaginnarluta paasissutissarpassuit saqqummertarput.

Stephen sulisut aalajaatsut allat assigalugit pikkorissartarsimavoq, tunisassiorfimmilu tatigisaalersimavoq assigiinngitsunik akisussaaffeqartarluni, ilaatigut suleqatigiiaanik aqutsisutut.

Stephen tunisassiorfimmi sulileqqaarnerminiit nuannersunik eqqaamasaqarpoq. Ukiukkut sikuunera pissutigalugu raajarniartoqarsinnaajunnaaraangat tunisassiornerlu unikkaangat sulisut allanik suliassinneqartarput, soorlu tunisassiorfik tamakkerlugu qalipallugu. Aamma akissarsititsisarneq allanngorsimavoq. Stephen akissarsiarsiarisimasami puuanik toqqortaatiminik nassaarsimavoq, taannalu assit ilaanni takuneqarsinnaavoq.

- Taamani banki aqqutigeqqaanngikkaluarlugu allaffimmili aningaasaannarnik akissarsisarallaratta. Tigusakkagut aningaasarpassuusarput, ilaali angajoqqaannut aamma tunniuttarpakka sinnerilu maani illoqarfimmi aningaaserivimmut Bikubenimut nakkartittarpakka, Stephen oqaluttuarpoq oqarlunilu illoqarfitsik maannakkut aningaaseriveqanngitsorluunniit.

Raajarniarnerup nalaani Qasigiannguit 1982-imi inoqarnerpaammata innuttaasut 1.803-usimapput, ullumikkullu illoqarfimmi inuit 1.115-iupput.

Allattoq: Káte Hansen, kaha@royalgreenland.com

Assit: RG

Asseq

 
 

Royal Greenland aperiguk

i
Write the text from the image