Janne Ojala 25-nik ukioqartuusoq aammalu uumassusilerineq pillugu ilinniarnerminik ukiut sisamassaannik ingerlatsisoq Nordjobb aqqutigalugu Kalaallit Nunaannut suliartornissaminik neqeroorfigineqarpoq. Angerninilu uggorsaatiginngivippaa.

- Kalaallit Nunaat pillugu ilisimasaqarfigisimanngilara, Kalaallit Nunaannullu suliartornissamik neqeroorut soqutigalugulu nunamik takornarfigisassatut pissanngatigeqaara. Maaniinneralu nuannerluinnarpoq.

- Tunisassiorfimmi sulineq nuannaraara. Soorunami aallaqqaataani aalajangersimasumik periuseqarluni sulinissaq nalunarpoq, ingerlatileriarakkuli tunisassiorfimmi tunisassioriaatsip tamarmiusup takunera peqataaffigineralu soqutiginarsiartuinnarpoq, Janne Ojala oqaluttuarpoq.

Janne Finlandimi mamakujuttunik tunisassiorfimmi sulilluni misileereersimavoq, naallu Maniitsumi tunisassiorfimmi sulinini arlalitsigut suleriaatsinik ilisarsiffigisaraluarlugu illoqarfimmut tikilluaqquneqarluarnertik alutorsaatigegaa.

- Tunisassiorfimmi sulisut arlallit tuluttut attavigisinnaavagut, taavali ilaat ussersorluta paaseqatigiiffisinnaasarpagut.

- Maniitsumiinnera nuannaraara. Illut qaamasut qalipaatigissaaqisullu pinneqaat, inuillu inussiarneqaat. Aqqusinermi pisukkaangatta inuit naapikkiartuleraanni qungujulasarput ilassiortarlutillu, Janne Ojala unnersiorpoq.

Jannep illoqarfik avinngarusimasutut aallaqqaammut misigisimavaa pingaartumillu internetitigut attavilunnera tupaallaatigisimavaa, taamalu ilaquttaminik ikinngutiminillu attaveqarniarneq ilungersunaraa aammalu nutaarsiassanik malinnaasinnaanini killeqartillugu.

Nordjobbimeersut Royal Greenlandip Maniitsumi tunisassiorfiani sulinerannut atatillugu inuusuttut Maniitsup eqqaani umiatsiamik takornariartinneqarput.

- Sermersuarmut timmissallu erniorfiannut timmiarpassualimmut takornariarluta angalaarnerput alutornarluinnarpoq, arferilli qulit tungaannut amerlassusillit meeterit 20-t qanitsigalugit isiginnaakkagut anersaartorpalunnerannillu tusaasaqarfigut soqutiginarnerpaapput. Taamaammat maannamut sapaatip akunnerini marlunni maaniinnera nuanneqaaq, sapaatillu akunnerini sisamani suli maaniinnissara qilanaaraara, Janne oqaluttuarpoq.

Allattoq: Káte Hansen, kaha@royalgreenland.com

Assit: RG Maniitsoq

Asseq

 
 

Royal Greenland aperiguk

i
Write the text from the image