Illoqarfigisami sulisussaaleqineq pissutigalugu Royal Greenlandip Maniitsumi tunisassiorfia Nordjobbemit sulisussanik arfineq pingasunik tikisitsivoq. Taamalu inuusuttut 20-niit 26-t angullugit ukiullit Nordjobb aqqutigalugu Finlandimit, Sverigemit aammalu Danmarkimit tikisitat tunisassiorfimmi juunip 24-aniit sulilerput aggustillu tallimaata tungaanut sulissallutik.

- Tunisassiorfimmi Nordjobb aqqutigalugu sulisoqarnerput maannamut iluatsilluarpoq. Inuusuttut tunisassiorfimmi sulisorilersimanngikkaluarutsigit tunisassiorfimmi sulisunik paarlakaajaatitaqarsimanavianngikkaluarpugut. Taamaammat inuusuttut ingerlalluaqaat sulinerannillu nersualaarneqartaqaat, Finn Larsen tunisassiorfimmi quersualerinermi assartugalerinermilu aqutsisoq aammalu sulisut Nordjobbimeersut Maniitsumiinnerannik akisussaasuusoq unnersiorpoq.

Inuusuttut Nordjobbimeersut tunisassiornermi assigiinngitsunik sulisinneqarput. Ilaat tunitsivimmi ullukkorsiorlutilluunniit unnukkorsiortarput, allallu tunisassiorfivittaviani ullukkorsiorlutilluunniit unnukkorsiortarput.

Naak Nordjobbimeersunik ikiorteqaraluarlutik tunisassiorfimmi sulisussanik 40-nik pissarsiniarneq suli ajornartorsiutaavoq. Taamaammallu tunisassiorfimmi aqutsisut inuusuttut Nordjobbimeersut taamaatiaarnissaat uggoreqaat.

- Inuusuttut Nordjobbimeersut inissaqartinniarnerisa ajornartorsiutaanera pissutigalugu ajoraluartumik aggustip tallimaata tungaannaanut maaniissinnaapput, tamannalu uggornaqaaq, tassami sullarillutillu ullaakkut piffissaq eqqorlugu suliartortaramik aalajaatsuupput. Naak inuiaqatigiinnut piorsarsimassutsimullu takornatanut tikeraaraluarlutik sulisoralugit eqinnaaqaat ingerlalluaqalutillu. Aammattaaq nerisarfimmi akisunngitsunik nerisinnaanertik qujamasuutigaat, Finn Larsen oqaluttuarpoq.

Inuusuttut kollegiami juulip 24-ata tungaanut najugaqassapput, tamatumalu kingorna illoqarfiup efterskoleani sapaatit akunnerini marlunni kingullerni najugaqarsinnaassapput.

- Royal Greenlandi ajoraluartumik inissaqartitsinngilaq, taamaammallu inuusuttut aggustip tallimaata kingorna sulisorisinnaanngilagut. Taamaakkaluartorli Nordjobbimeersunik maanga suliartortitsineq iluarisimaarnaqaaq, aalajangereerpugullu Nordjobbimeersunik aappaagumut sulisoqarnissarput pimoorullugu sulissutiginiarlutigu, Finn Larsen naqissusiivoq.

Nordjobb inuusuttunut 18-it 28-llu akornanni ukiulinnut Nunani Avannarlerni aasaanerani suliffissanik, ineqarnermik aammalu piorsarsimassutsitigut sammisassaqartinneqarnissaannik 1985-imiilli neqerooruteqartalersimavoq. Taamaasillu Nordjobb inuusuttut sulisitsisullu sulisussaqarniarnikkut eqaatsumik peqataanissaannut periarfissiisuuvoq.

Nordjobb pillugu annertunerusumik uani paasisaqarsinnaavutit: http://www.nordjobb.org

Allattoq: Káte Hansen, kaha@royalgreenland.com

Assit: RG Maniitsoq

Asseq

 
 

Royal Greenland aperiguk

i
Write the text from the image