- Juulip aallartinnerani aalisartut Aappilattup eqqaani nunaqarfinneersut illoqarfinneersullu illu unnuisarfissaat ammarneqarmalli umiatsiaararsorlutik aalisartut Nanortalimmeersut Narsaq Kujallermeersullu arlaqartut Aappilattumi Royal Greenlandip tunisassiorfianut tunisisalermata tunisat annertusipput, Narsami Royal Greenlandip tunisassiorfiani pisortaq aamma Aappilattumi tunisassiorfimmi nakkutilliisoq Niels Sakariassen oqarpoq.

Aalisartut Aappilattup eqqaani nunaqarfinneersut illoqarfinneersullu nunatta kujaterpiaani aalisariaraangata unnuiffissaqarnissaannut periarfissaqartikkumallugit Royal Greenland Aappilattumi oktobari 2015-imi illusivoq. Illu ilaqutariinnut illutut sanaajusoq sisamanik initaqarpoq igaffeqarluni inunnut arfineq pingasunut siniffissaqarpoq. Illu maanna nutarterneqareerluni nutaaliaasunik atortorissaarutilersorneqareerpoq.

Isumalluarpoq

- Illup nutarterlugu suliarineqarnera naatsorsuutigisamiit sivisuneruvoq, kisianni maanna atuutilerpoq, tamannalu nuannaarutigaarput, Niels Sakariassen oqarpoq.

- Ukiariartornerani qaleralinniarneq aallartilluariarpat aalisartut Aappilattup eqqaani nunaqarfinneersut illoqarfinneersullu maanga aalisariartalernissaat naatsorsuutigaara. Aalisartut Narsameersut Qaqortumeersullu illumik unnuisarfissamik pilersitsisoqarnissaanik pilersaaruteqartoqalermalli illup qanoq ilinerani atuutsinneqalernissaa pillugu paasiniaasarput. Taamaattumik ukiariartornerani nunaqarfimmi tunisassiorfimmut tunisineq marloriaatinngorumaartoq isumalluaatigaara, Niels Sakariassen oqarpoq.

Nunaqarfimmi avinngarusimasumiittumi Aappilattumi tunisassiorfik ukiorpaaluit matoqqareerluni 2014-imi novemberimi ammarneqarpoq. Tunisassiorfik sisamanik sulisoqarpoq. Tunisassiorfimmi ullormut tonit sisamat tunisassiarineqarsinnaapput

Allattoq: Inga Egede, ineg@royalgreenland.com

Assit: Niels Sakariassen

Asseq

 
 

Royal Greenland aperiguk

i
Write the text from the image