KNAPK isumaqarpoq nipisanniarnerup iluatsinnginnera silamik aammalu aqutsiveqarfinni ulluni 47-ini nipisanniarsinaannermik killeqartitsineq aalisarneliornermut pissutaasoq.

- Nipisanniarnerup aallartinnerani silarlunnera ilaatigut pissutigalugu nipisanniarneq iluatsinnginngilaq. Kujataani nipisanniarneq sivitsorneqarpoq kisianni Kitaata Qeqqani nipisanniarnerup sivitsorneqarnissaa iltigartitsissutigineqarluni. Taamaattumik nipisanniarnermi aqutsiveqarfinnut immikkoortiterineq aalisarnerliornermut pissutaanngilaq, kisiannili silamik aamma aqutsiveqarfinni ulluni 47-ni aalisarsinnaanermut killeqartitsineq Nunatta Kitaata silaata pissusianut tulluutinngitsoq, KNAPK-imi pisortaq Petrus Biilmaan oqarpoq.

Sapaatip akunnerata kingulliup naanerani – aqutsiveqarfinni amerlanerni nipisanniarnerup unereernerani nipisat suaat pisassiissutigineqartunit 1500 tonisusunit 737 tonsit aqutsiveqarfinni tunitsivinnut tunineqarsimasut nalunaarutigineqarpoq.

45 procentinik annikinnerupput

Aqutsiveqarfiit avannarpasinnersaani Qeqertarsuarmi tallimanngormat nipisat suaannik tunisineq unippoq.

- Ukioq manna nipisat suaat 38 tonsit tunineqarput. Siorna aalisarsinnaanerup sivitsorneqarneratigut pisassiissutigineqartut 63 tonsit tamarmik tunineqarput, Qeqertarsuarmi Royal Greenlandip tunisassiorfiani ingerlatsisoq Emil Mølgaard oqarpoq.

Aqutsiveqarfinni allani Royal Greenlandip tunitsiviinut nipisat suaanik tunisineq assigiinngiijaarpoq, kisiannilili tamatigut tunisineq siornaniit annikinneruvoq, taamaallalli Ikamiuni aamma Ikerasaarsunni siornarniit annertunerusunik tunisisoqarpoq.

Ulluni 47-ni aalisarsinnaaneq atorunnaarsinniarneqarpoq

Nipisianniarnermi aqutsiveqarfiit arfineq marlunnut agguataarineq aqutsiveqarfinnilu aalisartut ulluni 47-ini nipisanniarsinnaanerat siorna atuutsinneqalerpoq. Aamma aqutsiveqarfinni pisassiissutigineqartut pisarineqanngippata pisassiissutigineqartut aqutsisoqarfimmut tulliusumut tunniunneqarsinnaanerinik malerugassaq siorna atuutsinneqalerpoq.

KNAPK aalisartut isumasioqatiginerisigut aqutsiveqarfinni ataasiakkaani qanoq ilinerani nipisanniarnerup aallartinnissaanik aalajangiisuusartoq isumaqarpoq ulluni 47-ni aalisarsinnaanermik maleruagassaq atuukkunnartinneqartariaqartoq.

- Ulluni 47-ini nipisanniarluni aalisarsinnaanermik maleruagassap atorunnaarsinneqarnisssaa KNAPK-imiit anguniarneqarpoq. Taarsiullugu sumiiffinni assigiinngitsuni tunitsivinni nipisat suaasa inerinnerinik naliliinerisigut nipisannarnerup qaqugukkut aallartinnissaanik aalajangiisuusalernissaat anguniarparput. Taamatuttaaq suaat inerippallaarnerinik aqutsiveqarfinni tunitsiviit naliliinerisigut nipisanniarnerup unitsinneqarnissaanik aalajangiisuusinnaalernissaat anguniarparput. Tassa imaappoq aqutsiveqarfinni pisassiissutigineqartut nungunnissaasa tungaanut imaluunniit suaat inerippallaarnerini aalisarnerup unitsinneqartalernissaa anguniarneqarpoq, Petrus Biilmann oqarpoq.

Siorna nipisat suaat pisassiissutigineqartut 1500 tonsiusut tamakkiisumik pisarineqanngitsoorlutik 1000 tonsit tunineqarput.

Allattoq: Inga Egede, ineq@royalgreenland.com

Assit John David Eriksen

Asseq

 
 

Royal Greenland aperiguk

i
Write the text from the image