Saarullinnnik tunisinerup annertusinera Nuummi Royal Greenlandip tunisassiorfiani malugilluarpaat ukioq mannami saarullinnik tunisineq siornarniit 40 procentinik annertuneruvoq.

Aap, ukioq manna saarullinnik tunisisoqarluarpoq. Siorna piffissap taassuma iluani saarulliit 450 tonsit tunineqarput, ukioq mannali aalisariutit uagutsinnut tunisisartut aqqaneq marluusut maannamut 616 tonsit tunereerpaat, Nuummi Royal Greenlandip tunisassiorfiani ingerlatsisoq Theo Didriksen oqarpoq, nangipporlu:

- Ukioq manna bundgarnersorneq aallartimmat aalisariutit marluk uagutsinnut tunisisarput, maannakkulli aalisariutit aqqaneq marluk tunisisarlutik.  Saarulliit ullormut 30 tonsit tunisassiarisinnaavagut. Maannakkorpiaq saarulliit 115 tonsit 124 tonsillu akornanni annertussuseqartut sapaatip akunnerata iluani tunineqartarput.

Sulisut aalajaatsut

Naak illoqarfimmi allanik marlunnik tunitsiveqaraluartoq aalisartut Royal Greenlandip tunisassiorfianut tunisilluarnerat Theo Didriksenip nuannaarutigaa, taamatuttaaq sulisut sulilluartut  sapaatillu akunnerata naanerani sulerusuttunik sulisoqarnini nuannaarutigaa.

- Apriilip qeqqata missaanili tunisassiorfimmi ulapilerpugut. Taamaattumik aalajangersimasumik sulisuvut 20-iusut marloriaatinngorlugit maanna 40-it sulisoraavut. Tunisassiornermi sulisut sapaatip akunnera naallugu ullut tamaasa sulisarput –aamma nalliuttuni. Taakku aalajaallutik sulilluarput sapaatillu akunnerata naanerani suliumanerat nuannaarutigaara, Theo Didriksen oqarpoq.

Theo Didriksenip neriuutigaa saarulleqarluarnerata nalaani tunisineq  ingerlalluaannassasoq  taamatuttaaq sulisut sulilluaannarnissaat neriutigaa.

- Naatsorsuutigaara aggustusi ilanngullugu saarulleqarluarumaartoq. Junip 20-iani Qeqertarsuatsiaat eqqaani kilisaat tunitsivik ivertinneqarpat ilimanarpoq aalisariutit arlaqartut taqqavunga aalisariassasut. Kisianni Nuup eqqaani saarulleqaannassappat neriuutigaara tunisineq ingerlalluaannarumaartoq, Theo Didriksen oqarpoq.

Sineriammi Royal Greenlandip tunitsiviini tamarluinnangajanni ukioq manna saarullinnik tunisineq qaffariarpoq.

Maniitsumi Royal Greenlandip tunisassiorfianut saarullinnik tunisianeq pingasoriaammik qaffappoq, siorna 2015-imi januarimiit maj ilanngullugu saarulliit 263 tonsit tunineqartut ukioq manna piffissap taassuma iluani 1000 tons tunineqarmata.

Allattoq: Inga Egede, ineg@royalgreenland.com

Foto: RG

Asseq

 
 

Royal Greenland aperiguk

i
Write the text from the image