Ilinniagaqartut soraarummeernerminni angusaq BB angugamikku angusipput.

- Iluarsartuullugu pilersaarusiorlugu suliaqarnerput pissanganarsimaqaaq. Kiisami tassa isumannaarpoq aamma angusigattta oqiliallannaqaaq. Maanna ilinniakkatsinnik nangitsisinnaanngorpugut, ilinniagaqartut ilaat Aqissiaq Petrussen oqarpoq.

Ilinniakkamik ingerlataqartut sisamaasut ilinniaqataallu allat 15-iusut iluarsartuullugu pilersaarusiukkamik suliaqarnerminnut ullut tallimat atorsimavaat, taamatuttaaq soraarummeernermi naliliinermi aallaaviusussamik suliaminnut attuumassuteqartumik saqqummersitsinissamut pilersaarusiornermut aamma ullut tallimat atorsimallugit. Atuaqatigiinni SK2-mi ilinniagaqartut allat Nuummi suliffeqarfiit pillugit iluarsartuullugu pilersaarusiorlutillu saqqummersitsipput. Ilinniagaqartut soraarummeernerat ippassaq pingasunngornermi junip ulluisa arfineq pingajunanni Nuummi Niuernermik Ilinniarfimmi pivoq.

Suliaq pissanganartoq

Aqqissiaq Petrusseni atuaqatini Ivalu Poulsen, Morthen Møller aamma Ruth Frederiksen peqatigalugit Royal Greenlandimi saarullinnik kapisilinnillu tunisassiorneq tuniniaanerlu pillugit iluarsartuullugu pilersaarusiorlutik soraarummeerusuiorniarlutik toqqarsimavaat.

- Allaaserinninnginnitsinni misissuilluta paasiniaanitsinni paasivarput qulequttat toqqarneqarsinnaasut piukkunnartut periarfissaasut arlaqartut Royal Greenland pillugu periarfissaasut. Taamaattumik saarullinnik kapisilinnillu Royal Greenlandimi tunisassiorneq tuniniaanerlu pillugu immikkut allaaserinnniarluta toqqarparput. Iluarsartuullugu pilersaarusiukkamik suliaqarnerup ineriartornera ilikkagaqarnaqaaq aamma pissanganaqaaq, aamma Royal Greenlandip allaffissuani immikkoortortaani arlaqartuni paasissutissat pissarsiavut annertupput.

Ilinniagaqartut iluarsartuullugu pilersaarusiornermikkut aammalu saqqummersitsinermikkut angusigamik maanna ilinniarnertik ukiuni sisamani sivisussuseqartoq nangissinnaanngorpaat.

Nersualaarneqarput

Pisiniarfimmiunngorniarlutik allaffimmiunngorniarlutillu ilinniagaqartut ilinniaqatitillu iluarsartuullugu pilersaarusiartik illersorlugu soraarummeeqqammisut naliliinermilu BB-mik nalilerneqaqqamersut Niuernermik Ilinniarfimmi naapippagut.

-Nersualaarneqarpugut aamma suliatigut piginnasaqartutut nalilerneqarpugut, Ruth Frederiksen oqarpq ilinniaqataalu Morthen Møller ima oqarpoq:

- Royal Greenlandimi kilisaatini inuttaqarnermi immikkoortortaqarfik, Nunatsinni tunisassianik tuniniaanermi immikkoortortaqarfik aamma Nuummi Royal Greenlandip tunisassiorfiata ingerlatsisua suliatsinnik suliaqarnitsinni ikiuussimanerat pillugu qutsavigerusuppavut. Taakku paasissutissanik uatsinnut tunniussinerat toqqammavigalugu maanna saarlullinnnik kapisilinnillu tunisassiornermi tuniniaanermilu periutsit pillugit iluarsartuullugu pilersaarusiamik aammalu kusanartumik saqqummersitsilluta suliaqarnitsinni angusaqarluarnitsinnut taakku ikiuunneratigut pivoq.

Nuummi Niuernermik Ilinniarfimmi SK2 –mi ilinniagaqartut suleqatigiit allat sisamat Nummi suliffeqarfiit STARK, Nuka- Din Tøjmand, Butik Pappi aamma Inspiration pillugit iluarsartuullugu pilersaarusiorlutillu saqqummersitsipput.

Allattoq: Inga Egede, ineg@royalgreenland.com

Assit: John David Eriksen

Asseq

 
 

Royal Greenland aperiguk

i
Write the text from the image