Royal Greenlandip Kalaallit Nunaanni tunisassiorfiini 37-usuni sulisooreersut avataasigut aasaanerani sulisussaaleqisoqalersarpoq. Ukioq mannalu allaanerunngilaq. Royal Greenland illoqarfinni nunaqarfinnilu tunisassiorfinni 17-ini suliffissanik 150-it sinnerlugit piffissami matumanerpiaq neqerooruteqarsinnaavoq.

Royal Greenlandimi misilittakkat aallaavigalugit ukioq manna allatut iliuuseqarnikkut tunisassiorfinni ataasiakkaani sulisussanik kisitsisaatinik ataavartumik nittartakkatigut saqqummiisarniarpoq, taamatuttaaq suliffissarsiortut nittartagaq aqqutigalugu illoqarfinni nunaqarfinnilu oqarasuaatitigut sianerasuarfigisinnaasaannik periarfissinneqassapput. Paasissutissallu suliffeqarfissuup Facebookiani aamma atuarneqarsinnaassapput.

- Sulisussanik amigaateqartarnerput assigiinngitsunik peqquteqartarpoq. Aalisarneq aasaanerani qaffasinnerpaasarpoq, inuit aasaanerani sulinngiffeqartarmata sulisussanik aallanik pissarsiariuminaattarpoq aammalu najukkani assigiinngitsuni ulapaarfiup nalaani suliartorsinnaasunut inissaqartitsiniarneq ajornartorsiutigisinnaasarparput, Attaveqarnermut Sulisoqarnermullu Pisortaq Jens K. Lyberth nassuiaavoq.

Sulisussanik amigaateqarneq procentimut agguaqatigiissillugu 22 procentiuvoq. Ikerasammi tunitsivik sulisussanik amigaateqarfiunerpaavoq tamakkiisumik tunisassiorsinnaanissamut sulisinnaasut 59 procentii amigaatigineqarmata. Sulisussanik procentinngorlugu amigaateqanngiffiunerpaavoq Ilulissat, tassani sulisinnaasunik amigaatigineqartut 13 procentiugamik.

Suliffissatut neqeroorutinik kisitsisaatit www.royalgreenland.gl –ip saqqaani nassaarineqarsinnaasut sapaatip akunnikkaartumik nutarterneqartassapput. Suliffissarsiortullu nittartagaq aqqutigalugu sianerasuarfigisinnaasaannik pilersitsinikkut tunisassiorfinnut suliffigerusutaminnut toqqaannartumik saaffiginnissinnaassapput.

Allattoq: Káte Hansen, kaha@royalgreenland.com

Ilusilersugaq: John David Eriksen

Asseq

 
 

Royal Greenland aperiguk

i
Write the text from the image