- Ilulissani tunisassiorfiup ikuallannera sulisunik tunisassiorfivittavianillu qujanartumik eqquinngilaq. Innaallagissap aqqutai tamarmik ajoquteqanngillat, raajanillu tunisassiorneq ullup qeqqata missaani aallartinneqarsinnaassaaq, tunisassiorfimmi ingerlatsisoq Jensigne Schmidt oqarpoq.

Ikuallanneq tunisassiorfiup avannaata tungaani meeterit arfinillit missaanni ungasissusilimmi palletsinik kaarinillu uninngasuuteqarfiusumi aallartissimasoq ima sakkortutigilersimavoq allaat tunisassiorfiup iigaanik ikuallatsitsilersimalluni. Ikuallannermi majuartarfeqarfik elevatoreqarfillu eqqorneqarput. Ikuallanneq aallartimmat eqqiaasut ikittuinnaat sulisimapput.

Tunisassiorfimmi ingerlatsisoq aqutsisoqartaalu qaatissimasut ikuallannerup annertussusaanik aammalu tunisassiorfimmik qanoq eqquitigisimaneranik ullaaralaamiit misissuillutik aallartissimapput.

- Tunisassiorfiup avannaani ikuallanneq tunisassiorfivittavianit meeterit tallimat missaannik ungasitsigaaq qujanartumillu siaruaassimanani. Poortuutissatut uninngasuutigut ikuallannermit aamma eqqorneqarsimanngillat, taamaammat qaleralinnik raajanillu tulaassuineq nalunaaquttap akunnerinik arlalialunnik kingusinaarluta aallarteqqippagut, tunisassiorfimmi ingerlatsisoq nassuiaavoq.

Raajarniut Bingo 3 Ilulissani tunisassiorfimmut tunisereerpoq. Raajarniut alla aamma tulaassisussaagaluartoq suli kilisatsillugu tunisassiorfiup ingerlatsisuanit ippassaq unnukkut nalunaaqutaq aqqarnup missaani sianerfigineqarpoq qinnuigineqarlunilu Sisimiuni raajaleriffimmut tulaassiartoqqullugu.

Ilulissani politikommissæriugallartoq Carl Sværd ilisimatitsivoq, Dannmarkimi Nationalt Kriminalteknisk Centerimeersunik paasiniaajartortussanik tikisitsinissaq Ilulissani politiit aalajangersimagaat.

Ikuallattoqarnerani assit ataani takukkit.

Asseq

 
 

Royal Greenland aperiguk

i
Write the text from the image