- Aalisartut sinniisaat ataatsimeeqatiginerini isumaqatigiissutigaarput tunisinermut pilersaarut malillugu tunisineq ingerlanneqassasoq. Tassalu ullumi ataasinngorneq aallarnerfigalugu Sisimiuni aammalu Sarfannguani tunisisinnaanermut pilersaarut malillugu aalisartut tunisisinnaanngorput, Sisimiuni Royal Greenlandip tunisassiorfiani ingerlatsisoq Hans Lars Olsen oqarpoq.

Sisimiuni Royal Greenlandip tunisassiorfiani aqutsisut aalisartullu sinniisaasa ataatsimeeqatigiinnerminni isumaqatigiissutigaat aalisariutit ulloq allortarlugu tunisisinnaassasut - annerpaamik tonsit tallimat tunisinnaallugit. Sisimiuni umiatsiaarsorlutik aalisartut ullut tamaasa 700 kiilut tunisinnaalerpaat Sarfannguani aalisartut ullormut karsit 15-it Sarfannguani tunisisassiorfimmut tunisinnaagaat.

Sulisussaaleqipput

Hans Lars Olsenip neriuutigaa Saarullinnik tunisassiornermi maanna inunnik 35-inik sulisoqartumi unnukkoorsinaasunik sulisunik paarlagiiaanik marlunnik pilersitsisinnaalluni.

- Tunisassiorfimmi tunisinerup unitsikkallarneqarnera tusagassiutitigut saammineqareersoq sulilerusuttunit saaffigineqarpugut, kisiannili suli sulisussaaleqivugut. Taamattumillu Sisimiut Tusaataat aqqutigalugu sulisussarsiorniarluta aalajangersimavugut. Neriuppugut taamaasilluta saarullinnik tunisasiornermi sulisinnaasunik nutaanik pissarsisinnaassalluta, Hans Lars Olsen oqarpoq naggataatigullu ima oqarluni:

- Taamaattumik inuit sulisinnaasut kaammatussavakka tunisassiorfimmut saaffiginneqqullugit.

Sisimiuni Royal Greenlandip tunisassiorfiani maannakkorpiaq raajanik, saattuanik, suannik aammalu saarullinnik tunisassiornermi inuit 130-it missingi sulisorineqarput. Tunisasiorfiup ingerlatsisuata neriuutigaa saarullinnik tunisassiornermi sulisut nutaat 30-it 35-illu akornani amerlassusillit sulisorilersinnaallugit.

Allattoq: Inga Egede, ineg@royalgreenland.com

Asseq

 
 

Royal Greenland aperiguk

i
Write the text from the image