Inuusuttut 30-it 17-iniit 21-inik ukioqartut ataasinngormalli pikkorissarnermi "Inuusuit Kivitsisussat"-nik taaguuserneqartumi pikkorissartineqarput. Royal Greenlandip AWG 2016-mut tapiissutanut Nanoq-mik taaguserneqartumut pikkorissartitsineq ilaavoq.

Ataatsimoorluni aqutsisinnaaneq, kajumissutsimik sulineq kiffartuussinerlu, issittumi inooriatsit oqaatsillu, Arctic Winter Gamesimi ingerlatsisarneq aammalu tusagassiutinut tunngasunik sammisaqartitsinermik pikkorissartitsineq imaqarpoq.

- Inuusuttut siunissami inuunissaminni aammalu kajumissusseq aallaavigalugu AWG-mi sulinerminni pitsaanerpaamik kiffartuussisinnaangornissaat anguniarlugu piginnaanngorsarlugillu isumassarsitinnissaat siunertaavoq, Royal Greenlandimi nunatsinni tunisassanik tuniniaanermi ingerlatsisoq Malik Hegelund Olsen oqarpoq.

AWG-qartoqarnerani tikeraat pitsaanerpaamik kiffartuussisinnaajumallugit aamma inuusuttut siunissaat eqqarsaatigalugu piginnaanngorsarneqarnerneranni inuttut ineriartorneq, issittumi inooriaaseq, kajumissutsimik sulineq, tusagassiutinut tunngasut, suliffeqarfinnut pulaarnerit, tuluit oqaasii pillugit inuusuttut pikkorissartinneqarput. Taamatuttaaq Nuummi suliffeqarfiutilinnit soorlu Nuuk Couturemi ingerlatsisumit, atuagassiami ANU-UNA-mi ingerlatsisumit aammalu Kalaallit Nunaanni Brugseniini sulisumit inuusuttut saqqummiivigineqarput.

Ikioqatigiinneq pingaaruteqarpoq

Pikkorissaqataasut 30-it ilagaat 21-inik ukiulik Malene Vahl Rasmussen. Taanna pikkorissaqatimisuulli kajumissuseq aallaavigalugu pikkorissarnermi peqataasoq oqarpoq pitsaanerpaamik kiffartuussiniaraanni iliuuserisinnaasat pilllugit ilikkagaqarluni.

- Pikkorissarnermi peqataasut tamarmik tassalu pikkorissartut, pikkorissaasut, aaqqissusiusullu tamarmik kajumissusertik aallaavigalugu peqataapput, tamannalu assut kajumilersitsivoq. Ataatsimoorluni ikioqatigiilluni kivitseqatigiilluni suliaqarnissamut kajumilersitsivoq. Pikorissarnermi saqummiunneqartut ilikkagaqarfigisakka AWG-eqartoqarnerani aammalu siunissami inuuninni iluaqutigissallugit qularinngilara. Aamma siunissami annertuumik akisussaaffeqalerlunga suliffeqalissagaluaruma suliassat akisussaaffimmik annertuumik nassataqartut qanoq naammassineqarsinnaaneri pillugu paasisaqarpunga, Malene Vahl Rasmussen Nuummi Niunermik Ilinniarfimmi ilinniagaqartoq oqarpoq.

Inuusuit kivitsisussat pikkorissartinneqarneranni inuussutissarsiuteqartuni sulisunit, Inuit Issittormiut Kattuffianni ICC-mi, Nunatta Katersugaasiviani,, Piareersarfimmi, Kalaalit Nunaanni Timersoqatigiiffiit Kattuffianni kiisalu Tusagssiornermi Ilinniarfimmi sulisunit inuusuttut pikkorissartinneqarput. Pikkorissaasut akeqanngitsumik sulipput.

Allattoq: Inga Egede, ineg@royalgreenland.com.

Assit: John David Eriksen

Asseq

 
 

Royal Greenland aperiguk

i
Write the text from the image