Arsaaffimmi isikkamik arsaattut tassaapput niviarsissat Yukonimiut Alaskamiullu unammisut. Niviarsissat arsaaffimmi arpaliullutik arsaq malittaqattaaleruttorneranni isiginnaartut ataatsikkut suaartarlutik arsartut suaartaappaat. Dommerit nipituumik siggarpallattarnerat aamma tusarsaavoq.

Iserfik nipitoqaaq aamma isikkamik arsartut pimoorusseqaat. Unammineq marloriarlini minutsini 14-ini ingerlanneqareermat Yukonimiut ajugaasut nuannaaqalutik imminnut eqitaarput akeraat Alaskamiut nikallungakujuttut. Arsaattut dommerillu arsaaffik qimatsinnagu tulleriaallutik inissitsiteriarlutik imminnut assatik pattaateqattaappaat. Taamaalinerani arsaattussat tullii arsaaffimmut isaapput unamminissaminnullu piareersalerlutik.

Inuusuttut unamminertik pimooruppaat

- Aap, ulluni kingullerni arsaattut pimoorusseqaat. Arsaattut tamarluinnarmik pimoorussullutik arsaattarput, soorlu timersortartut unammersuarnerni allani aamma taamaattartut, arsaannermi naammasseqqammersumi dommeriusoq Albrecht Brandt oqarpoq. Taanna dommeritut ilinniarsimasuuvoq, kisiannili ulluinnarni Qeqertarsuarmi Royal Greenlandip tunisassiorfiani saffiuutut sulisarpoq. Albrecht Brandt sineriammi, Nuummi aammalu Svenstrupimi Royal Greenlandimi sulisut allat 24-it peqatigalugit Nuummi AWG-qartoqarnerani kajumissutsimik sulivoq.

- AWG-qartoqarnerani dommeritut sulinissara AWG-mi aaqqissuisullu isumaqatigiissutigereeripput Royal Greenlandimi sulisut AWG- mi kajumissutsimik sulisinnaanerannik paasitinneqarpunga. Taamattumik aningaasarsiakka tigummiinnarlugit suliaq nuannarisara- tassalu AWG-mi dommeritut sulineq ingerlassinnaavara. Taamatut aaqqissuussineq uannut assut iluarpoq, Albrecht Brandt oqarpoq.

Ukiorpassuanngortuni Nuummi timersortoqartillugu katersuuffimmi -Albrecht Brandip ulluni pingasuni kingullerni suliffigisaani piffissami kingullermi pimoorussisunnguaqarpoq. Ingammik kalaaliaqqat unammineranni timersortarfik ulikkaarluinnartarpoq.

- Aappassaanik AWG-mi isikkamik arsaannerni dommeritut sulivunga, Alaskami Fairbanksimi 2014-imi aamma dommeriugama. 2014-imi AWG-qartoqarneranut naleqqiullugu ukioq manna isikkamik arsaallutik unamminerit assorsuaq nuannarineqarput. Ukioq manna unammersuarnermi kalaallit nukappiaqqat assut ingerlalluarput, taamattumillu unammigaangata isiginnaariarpassuaqartarpoq. Ualiartornerani isiginnaariat 1000-it tikillugit isiginnariartamata isertut killilerniarlugit matut matuneqartalernikuupput, Albrecht Brandt ullluni makkunani ullormut akunnerit 14-it sulisartoq oqarpoq.

- Ataasinngormat ullaakkut arfineq pingasut qeqqa suliartorama unnukkut aqqaninngortoq soraarpunga. Ullut allat sulinikunnerugaluarlunga sulingaatsiarpunga, kisiannili sulinera nuannaraara, Albrecht Brandt arsaaffimmut iseqqinngitsiarluni oqarpoq.

Allattoq: Inga Egede, ineg@royalgreenland.com

Foto: John David Eriksen

Asseq

 
 

Royal Greenland aperiguk

i
Write the text from the image