- Dene Gamesimi unammiuaarnerit ingerlalluartorujussuupput. Pilersarutit malillugit unamminerit ingerlapput aamma unammiuaarnerit isiginnaarianit ornigarneqartorujuusspput. Taammattumik timersortartut aammalu dommerit AWG 2016-imi Dene Gamesimi Kommitii nersualaarpaat, taama oqaluttuarpoq Dene Gamesimi dommerit ilaat Claus Nielsen.

Claus Nielsen ulluinnarni Royal Greenlandimi sulisunik siunnersortitut sulisoq Royal Greenlandimi sulisut allat 24-it peqatigalugit AWG 2016-imi kajumissutsimik sulivoq.

Timersortartut nunani assiginngitsuni arfineq marluneersut100-it missingi Dene Gamesimi unammiuaarnerni peqataapput.

Indianerit piniariaasiat timersuutitut

Claus Nielseni Kalaallit Nunaanni Timersoqatigiit Kattuffianni allattaanertut atorfeqarnikuunini tunngavigalugu 2000-imili Artic Winter Gameseqartoqartarnerini peqataasarsimasup indianerit pinguaataat Dene Games pillugu ilisimasaqarluarpoq.

- Dene Gamesimi unammiuaarutit tassaapput nukeqassusermik takutisinerit indianerit piniarnerminni periusiannit aallaaveqartut. Unammiuaarutip "Snowsnake"-p siunertaraa eqqorniagaqarluni natikkut qisummik miloriussineq. Unammiuaarut taanna indianerit tuttumik nalasumik piniarnerminni periaaserisartagaannik aallaveqarpoq. Unammiuaarut alla tassalu "Stick pull" –ip eqalunniarnermi piniariatsimik aallaaveqarpoq. Eqaluit sarajattuummata kuummi assammik tiguniaraanni assak aammalu taleq nukittuujusariaqarput. Taamaattumik Stick pullimi unamminermi qisuk orsumik tanillugu nutsoruulluni nukeqarneqqusaattoqartarpoq. Unammiuaarutit allat aamma nukeqarneqqusaalluni unamminerupput, kisianni aamma indianerit aliikkusersoqatigiillutik pinguaataat allat Dene Gamesimi ingerlanneqartarput, Claus Nielsen oqaluttuarpoq, nangipporlu:

- Indianerit Inuillu pinguaataat Alaskami aammalu Canadami Arctic Winter Gameseqartoqartarnerini ornigarneqarluarnerpaajuaannarput, aamma ukioq manna AWG-qarnerani taamaappoq, taamaattumik Atuarfik Ukaliusap eqaarsaartarfiani inissaasuanerput uggornaqaaq, Claus Nielsen oqarpoq.

Kalaallit aqqanillit Dene Gamesimi unammiuaarnerni peqataapput. Nunavormiut, Yukonimiut, Alaskamiut aammalu North West Territoriemeersut maannamut Dene Gamesimi medaliannannerpaajupput.

Allattoq: Inga Egede, ineg@royalgreenland.com

Assit: John David Eriksen

Asseq

 
 

Royal Greenland aperiguk

i
Write the text from the image