- Royal Greenlandip tunisassiorfiinut saarulliit tulaassorneqartartut annertusinikuunerisa kingunerisaanik tunisassiorfiit saarullinnik tunisassiorfiusut unammiilligassaqangaatsialernikuupput. Taakku unammilligassat pitsaasumik aaqqivigisinnaajumallugit aamma Koszalinimi Royal Greenlandip tunisassiorfiani tunisassioriaaseq paasisaqarfigiumallugu Royal Greenlandip tunisassiorfiini ingerlatsisui tallimat Royal Greenlandimi saarullinnik tunisassiornermik suliaqartut peqatigalugit Koszalinimi paasiniaaqatigiipput, taama oqarpoq Royal Greenlandimi tunisassiornermi siunnersorti Jan Jørgensen oqarpoq.

Pissarsiffiulluarpoq

- Saarullinnik pitsaanerusumik pitsaassusilinnik tunisassiornissamut Polenimi angalanerput kajumilersitsivoq, Paamiuni Royal Greenlandip tunisassiorfiani ingerlatsisoq Koszalinimi paasiniaaqatigiinnermi peqataasoq Ilannguaq Abrahamsen taama oqarpoq.

- Paasiniaaqatigiinneq pissarsiaqarfigeqaara. Koszalinimi tunisassiornermi atortut tunisassioriaatsillu uagut tunisassiorfitsinni atuutsinneqalersinnaasut arlaqarput. Assersuutigalugu tunisassiornermi saaneraajaanermi atortoq Paamiuni tunisassiornitsinni atorsinnaasoq atuutsilersikkusuppara. Taanna atortorissaarut atorlugu nerpiit assammik atorneqarnatik saaneraajarneqarsinnaapput aamma tunisassiat pitsaanerusumik pitsaassusillit tunisassiarineqarsinnaapput. Taamaattumik atortorissaarutip tunisassiorfitsinni atuutsilertinneqarnissaa siunertaralugu akinik misissuivunga, Ilannguaq Abrahamsen oqarpoq.

Tunisassiorfinni ingerlatsisut aamma tunisassiornermik suliaqartut Polenimiinnerminni ilaatigut aamma saarullinnik tisanermi periutsit, saarullinnik qerisunik aatsitinermi periutsit aammalu tunisassianik immikkoortiterisarneq pillugu paasisassarsiortiinneqarput.

- Atortorissaarutit ilarpassui uagut tunisassiornitsinni atorsinnaangikkaluarlutigik tunisassioriaasiat paasisaqarfigalugu pissanganarpoq. Nunatsinni tunisassiornermi atorneqarsinnaasut arlaqartut paasisaqarfigaakka, soorlu tunisassiat qerisut aatseqqillugit suliarineqartarnerinut tunngasut atorluarsinnaasasavut paasisaqarfigaakka, Ilannguaq Abrahamsen oqaluttuarpoq.

Nunatsinni Royal Greenlandimi sulisut Polenemi paasiniaaqatigiillutik angalareeramik Svenstrupimi tunisassianik ineriikkanik tuniniaasarneq aamma tunisassianik naleqalersitsiartorluni periutsit pillugut paasisassarsiortinneqarput.

Royal Greenlandip Paamiuni, Maniitsumi, Sisimiuni, Kangaatsiami aammalu Qasigiannguni tunisassiorfii saarullinnik tunisasssiorput. Tunisassiorfinni taakkunani ingerlatsisut Polenimi paasiniaaqatigiinnermi peqataapput.

Royal Greenlandimi tunisassiornermi ingerlatsisup Sten Sørensenip angalaqatigiinneq aaqqissuussaraa.

Allattoq : Inga Egede, ineg@royalgreenland.com

Foto: Jan Jørgensen

Asseq

 
 

Royal Greenland aperiguk

i
Write the text from the image