Cecilie Jensen Svenstrupimi Royal Greenlandip allaffissornikkut allaffeqarfiani ulluinnarni sulisoq Royal Greenlandimi sulisut 24-it allat peqatigalugit issittormiut unammiuaarneranni Arctic Wintergamesimi kajumissutsimik sulivoq.

Cecilie Jensenip AWG-ip aallartinngitsiarnerani aammalu ingerlanneqarneran kajumissutsimik sulinissi toqqarpaa taamaattumillu timersoriat tikinnginnerini piareersaaqataalluni sumiiffinni arlaqartuni sulivoq. Ilaatigut timersoriat siniffissaannik katitereqataavoq. Kingusinnerusukkut kajumissutsimik sulisut sulinerat ataqatigiissaarlugu suleqataavoq naggataatigullu timersortartuaqqat unnuisarfiisa ilaanni Hans Lyngep Atuarfiani nakkutilliisutut suleqataavoq.

Ullormut akunnerit aqqaneq marluk sulivoq

- Ullut arfinillit sulininni ullut pingasut ullormut akunnerit aqqaneq marluk sulisarpunga. Kajumissutsimik sulisut suliffissaat ataqatigiissaarlu sulinera unammillernarsimavoq suliniarlutik nalunaartut takkutinngitsooraangata allanik sulisinnaasunik pissarsiortariaqartaratta. Naak kajumissutsimik sulisunik amigaateqartaraluarluta sapingisarput tamaat ikioqatigiilluarluta aporfiit ajunnginnerpaamik qaangerniartapavut, Cecilie Jensen oqaluttuarpoq.

- Kingorna atuarfiit ilaanni timersortartut unnuisarfigisaanni nakkkutilliisutut sulivunga, tassanilu meeqqat attavigilluarpakka. Meeqqat ilaatigut inigisaminni tukassaasaraluaqalutik inequnaqaat aamma pissuserissaarput. Meeqqat kajumissutsimik sulisuusugut nersualaartarpaatigut aamma Nuummi nuannisarnertik oqaatigisarpaat.

Ciclie Jensen aatsaat siullermeerluni Kalaallit Nunaaniittoq oqarpoq AWG –mi sulinermini nuannersorpassuarnik misigisaqarluni aamma Svenstrupimiit kajumissutsimik suliartortut allat peqatigalugit misigisassanik puigunaatsunik misigisaqarsimanertik oqaluttuaraa.

- Angallammut ilaalluta kangerlummi angalaarpgut. Angalaarneq nuanneqaaq ilaatigullu nunaqarfik Kapisillit takuarput. Kalaallit Nunaat alutornarluinnarmat naammatsiffiginngilara, taamaattumik tikeqqinnissara neriuutigaara, Cecilie Jensen ullumi marlunngornermi Danmarkimut uterluni aallartoq oqarpoq.

Royal Greenlandip AWG-mut Nanoq-mik taasami tapiissuteqarneratigut ilaatigut sulisut 50-it akissarsiaqaannarlutik AWG-mi kajumissutsimik sulisinnaanerannik ilaqarpoq. Sulisut 25-it kajumissutsimik suliumallutik nalunaarmata sulisut ilaat sapaatini akunnerni arlaqartuni AWG-ip aallartinnginnerani ingerlanneqarnerani allalli AWG-ip ingerlanneqarnerani kingornalu sulisinnaanissaminnik periarfissanninneqarput. Royal Greenlandip Svenstrupimi allaffeqarfiani sulisut sisamat AWG-mi sulieqataarusullutik nalunaarput taakkulu ilagaat Cecilie Jensen.

Allattoq: Inga Egede, ineg@royalgreenland.com

Assit: John David Eriksen

Asseq

 
 

Royal Greenland aperiguk

i
Write the text from the image