- Nioqqutissanik naammasseriikkanik Ukkusissaniit, Saattuniit aamma Ikerasammiit assartuititsivugut. Nunaqarfinni tunitsiviit ingerlaavartumik tunisassiornissaat aalisartulllu nunaqarfinneersut ukiuunerani ataavartumik tunisisinnaanissaat anguniarlugu taamaasiorpugut, Uumannami tunitsivimmi ingerlatsisoq Kirsten Jensen oqarpoq.

Nalinginnaasuuvoq nunaqarfinniit Uummannamut nioqqutissanik naammasseriikkanik assartuisarneq. Biilinik qamuteralannilluunniit palitsit marluk nioqqutissanik naamasseriikkanik imallit Saattuniit Uummannamut 35 kilometerinik isorartussusilik, Ikerasammiit Uummannamut 42 kilometerit missaani, Ukkusissaniillu Uummannamut 80-100 kilometerit missaanni isorartussuseqartoq ingerlaarfigalugu assartuinerit ingerlanneqartarput.

Assartueqqissinnaaneq periarfissaavoq

- Ukioq manna sillimaniarneq peqqutigalugu assartuinermi ataatsimi palitsinik marluinnarnik assartuisoqartarnissaa aalajangersimavarput. Siku minnerpaamik 20 centimeterinik issussusilik aqqusaarlugu assartuinerup ingerlanneqartussaanera pissutigalugu taama aalajangiinikuuvugut. Ukioq manna aalisartut 20-t siumut utimullu ingerlaarfik aqqusaarlugu assartuinerminni tamatigut aalisakkat 1600 aamma 1800 kilot missingi assartortarpaat, Kirsten Jensen oqarpoq.

Qalerallit nioqqutissiassat naammasseriikkat 160 tonsit missingi Ikerasanniit assartorneqartarput, 101,8 tonsit Saattuniit kiisalu 74,4 tonsit Ukkusissaniit assartorneqarlutik.

Uummannap nunaqarfiiniit Uummannap tunisassiorfianut nioqqutissanik naamasseriikkanik assartueqqinnissaq periarfissaasoq Kirsten Jensenip oqaatigaa, nunaqarfinnili tunisassiorfinnut tunisinerup annertussusia aammalu sikup qanoq innera apeqqutaassasoq aamma oqaatigaa.

Uummannami tunisassiorfimmi quersuaq qerititsiviutigisoq 1100 tons-inik imaqarsinnavoq.

- Pilersaarutaavoq Royal Arctic Linep umiarsuaatai Pajuttaat aamma Irena Arctica ataasinngorpat Uummannamut tikissasut. Umiarsuit siku ajornartorsiutiginagu Uummannamut apuunissaat neriuutigivarput, quersuarput qerititsiviutigisoq imaarniassammat, Kirsten Jensen oqarpoq.

Allattoq: Inga Egede, ineg@royalgreenland.com

Assit: RG Uummannaq

Asseq

 
 

Royal Greenland aperiguk

i
Write the text from the image