Qivioq Gregersen kujataani Narsap Kujallermiuusup Ataqqinartorsuaq Kunngissaq Frederik naapippaa Arctic Winter Gameseqartoqarneranut atatillugu aaqqissuinermi Youth Ambassador Programme-mi kalaallisut "Inuusuit Kivitsisussat"-ni pikkorissaqatini sisamat allat peqatigalugit Nuuk Kunstmuseumimi Kunngissap Frederiup AWG -imi aallartitat ullumi ulloqeqqariitsiartoq naapimmagit.

Kunngissaq Frederik AWG2016-imi illersuisutut AWG-p ammaanersiorneqarneranut atatillugu Nuummiippoq.

Inuusuttut sineriammeersut Nuummeersullu 17-iniit 21-inut ukiullit allat 29-it peqatigalugit Qivioq Gregersen Inuusuit Kivitsisussat pikkorissartinneqarneranni februarip 29-aniit marsip sisimaat ilanngullugu peqataavoq. Pikkorissarneq inuusuttut siunissaminni ingerlaqqinnerminni atorsinnaasaannik aamma kajumissusseq aallaavigalugu AWG-mi sulinerminni pitsaanerpaamik kiffartuussisinnaangornissaat anguniarlugu piginnaanngorsarlugit isumassarsitinnissaannik siunertaqarpoq.

Royal Greenlandip AWG 2016-mut tapiissutaanut Nanoq-mik taaguserneqartumut pikkorissartitsineq ilaavoq.

Pisuunnguallallunilu qujamasuppoq

Qivioq Gregersen Inuusuit Kivitsisussani pikkorissaqataanini AWG-milu suleqataanini qujamasuutigaa.

-Inuusuit Kvitsisussat pikkorissartinneqarneranni peqataanissamut periarfissinneqarama qujamasoqaanga nuannaarlungalu. Aamma AWG-mi peqataaninni pisuunnguallattutut misigivunga. Pikkorissarnermi oqalugiarfigitittarnitsinni aamma pikkorissaqatinnit immersorneqaqaanga. Ilikkakkakka AWG-mi sulininni atussavakka, ksianni aamma siunissami iluaqutigissavakka, Qivioq Gregersen oqarpoq.

Qivioq nunaqarfimmi inunngorfimmini 88-inik inulimmi najugaqartoq Niuernermi Ilinniarfimmi ilinnialerusulluni qinnuteqarsimavoq.

- Niuernermut tunngasut pillugit ilinniarusuppakka. Pikkorissarninni paasivara anguniagaqarniaraanni uteriilluni nakkaannarnaveersaarneq pisariaqartoq. Kisianni massakkut angerlaruma pikkorissarnermi ilikkakka aallaavigalugit nunaqarfimmi inuusuttoqatima timersornissaannik aammalu peqqinnartunik soqutigisaqarnissaannik kaammattorusuppakka, Qivioq Gregersen, Kunngissaq Frederik naapinngitsiarlugu oqarpoq.

AWG naammassippat Qivioq Gregersen nunaqarfimmut najukkaminut utissaaq, maannakkulli AWG-mi timersuutini silami ingerlanneqartuni nakkutilliisutut sulivoq.

Allattoq: Inga Egede, ineg@royalgreenland.com

Assit: John David Eriksen

Asseq

 
 

Royal Greenland aperiguk

i
Write the text from the image