- Aamma misileraalluni aalisarnermi paasineqarpoq Qaanaap eqqaani sinerissap qanittuani sikuutinnagu aalisarneq imminut akilersinnaanngitsoq, Ove Rosing Olsen oqarpoq.

Masiliup Qaanaap eqqaani sinerissap qanittuani avataanilu misileraalluni aalisarnera pivoq aggustusip naaneraniit oktoberip naanera tikillugu.

Misileraaffiit

Qaanaap eqqaani kangerlunni Masilik misileraalluni aalisarami sumiiffiit assigiinnngitsut sisamat misileraaffigeqqaarlugit kujasinnerusumi Qimusseriarsuarmi misileraavoq.

- Misileraaffiusumi siullermi Savissiviup eqqaani kangerlunni annertunerusumik eqalussuit pisarineqarput, Kap Yorkilli kangerluata isaariaani qaleralinnik naammatuuisoqarpoq. Misileraaffiit pingajuanni qaleraleqalaartoq misileraaffit sisamaanni qaleraleqanngilaq. Taamaattumik aasaanerani ukiaaneranilu suli sikunnginnerani qilalukkallu qaqortat qernertallu takkusimaarnerini taavani aalisarneq akilersinnaanngitsutut nalilerparput, Ove Rosing Olsen oqarpoq.

Qaanaap eqqaani sinerissap qanittuani Masilik misileraalluni aalisareerami Qaanaamiit 60 kilomiiterinik kujasissusilimmi avataani misileraalluni aalisarpoq.

Sumiiffinni aalajangersimasuni aalisagaqarpoq

- Qaanaap kujataani Qimusseriarsuarmi imminnguit, eqalussuit nuliaat aammalu qalerallit naammaginartumik annertusseqartut pisarineqarput, Ove Rosing Olsen oqarpoq.

Septemberip naajartornerani inuttat taarserneqareermata Masilik Qaanaap kujataani aalisaqqippoq.

- Paasisat ilagaat aalisarfiit aalisarfigineqarneri sivittsoriartortillugu aalisagaqassuseq pitsanngoriartortartut.Taammaattumik aningaasarsiutaasumik aalisassagaanni ataavartumik sumiiffik nikerartinnagu aalisartorqartariaqarpoq Ove Rosing Olsen oqarpoq.

Qaanaap kujataani aalisariaqqinnginnermini Masilik Qaanaap eqqaani sinerissap qanittuani misileraaqqippoq.

- Ukiup taamaalinerani aalisakkat kangerlunnut pulasarsimanissaat ilimagisimagaluaratsigu kingusissukkut taavani misileraaqqikkaluarpugut, kisiannili aningaasarsiutigalugu aalisarsinnaaneq ajoraluartumik taavani periarfissaanngilaq, taamatuttaaq Qeqertat eqqaanni, Ove Rosing Olsen oqarpoq.

Ningittagarsuutip oktoberip 24-iani Qaanaap eqqaani misileraanini taamatitsinnagu Qaanaamiit i 60 kilomiiterinik kujasinnerusumi Masilik aalisaqqippoq.

- Masilik amerligaluttuinnartunik eqalussuarnik pisaqartalermat paasinarsivoq ukiup taamaalinerani qaleralllit qimagussimasut, soorlu aamma kilisalluni aalisarnermi tamanna takuneqartartoq, Ove Rosing Olsen oqarpoq.

Masilik novemberip aallartinnerani Tunumi saarullinniariartorluni uiaruppoq.

Navigaltiomi saqqummersumi kingullermi Masiliup Tunumi Kitaatalu Avannaani aalisarnera pillugu atuarsinnaavutit, uani:

Allattoq: Inga Egede, ineg@royalgreenland.com

Assit: John David Eriksen

Asseq

 
 

Royal Greenland aperiguk

i
Write the text from the image