Nuummi Niuernermik Ilinniarfimmi TN-18-imi ilinniagaqartut allat 23-it peqatigalugit Anine Larsen sapaatit akunnerit 18-it ilinniagaqareerlutik sammiveqartumik iluarsartuullugu pilersaarusiukkaminnik saqqummiussipput. Anine atuaqatini arfineq marluk peqatigalugit Royal Greenlandip tunisassiaanik saqqummiussinissartik toqqarsimavaat.

TN-18-imi ilinniagaqartut sammiveqartumik iluarsartuullugu pilersaarusiukkamik saqqummiussinertik ippassaq sisamanngornermi Niuernermik Ilinniarfimmi tamanut ammasumik saqqummiuppaat. Tassani aamma ilinniagaqartut ilinniartitsisuisa saqqumiussinerat naliliffigaat, taamatuttaaq kingusinnerusukkut sammiveqartumik iluarsartuullugu pilersaarusiorlugu suliarisimasaat tamakkiisoq ilaatigut logistikki, tuniniaaneq sullissinerlu, niuerneq, suliffeqarfissuarnilu niuerneq pillugu taamaatuttaaq sammiveqartumik pilersaarusiukkamik saqqummiussinerat pillugu tamakkiisumik ilinniartitsisuminnit naliliiffiigineqarput.

- Royal Greenlandip tunisassiaanik saqummiussinissatsinik toqqaasugut suleqatigiinnut marlunnut avilluta saqummiussivugut. Suleqatigiit ataatsit tunisassiat naammasseriikkat suleqatigiillu aappaata nioqqutissiat ineriigaanngitsut suppaliaralugit allatulluunnit saqqummiuppaat, Anine Larsen oqarpoq.

Nutaaliorneq

TN-18-imi ilinniagaqartut Royal Greenlandip tunisassiai ineriikkat nioqqutissiallu ineriigaanngitsut illinnarluinnartumik kusanartumillu pulaartunut tamussiukkuminartunngorlugit sassaalliutigaat. Ilinniagaqartut aamma Royal Greenlandip ilisarnaataanik ilisarnaaserlugu tujuuluarartik naqinnilersimavaat, taamaaliorsimanerallu ilinniartitsisuanniit nersualaarneqarpoq.

- Aamma power –point atorlugu Royal Greenlandip oqaluttuassartaa aamma tunisassiornera pillugu Royal Greenlandip nittartagaani paasissutissanik aallerluta assinik saqqummiussivugut, Anine Larsen oqaluttuarpoq.

- Ilinniagaqartut nutaaliorsinnaassuseqarnertik takutippaat. Suliartik ilumoorupppaat aamma Royal Greenlandip tunisassiarisartagaanik saqqummiussinertik piareersarluarsimavaat, TN-18-imi ilinniartitsisoq Kit Moth Andersen takutisinermi kaajallaalluni naliliisoq oqarpoq.

Tapersersorti

Nioqqutissiat aamma tunisassiat ineriikkat ilinniagaqartut saqqummiussineranni atorneqartut tamarmik Royal Greenlandip nunatsinni tunisassianik tuniniaavianiit tapiissutigineqarput.

- Ilinniagaqartut sammiveqartumik iluarsartuullugu pilersaarusiukkaminnik saqqummiussineranni Royal Greenlandip tapersersuinera ilinniagaqartut akisussaassuseqarnerunerannik ilungersornerunerannillu nassataqarpoq. Minnerunngitsumik tapersersuineq atuarfiup assigiiinngiiartumik ilinniartitsisinnaaneranik periarfissiivoq, Kit Moth Andersen oqarpoq.

TN-18-imi ilinniagaqartut arfineq pingasut Royal Greenlandip tunisassiaanik saqqummiussiniarlutik toqqaasimasut sammiveqartumik iluarsartuullugu pilersaarusiorlugu suliartik illersorlugu soraarummeeramik angusaq B pissarsiaralugu angusigamik maanna Niuernermik Iliniarfimmi allafissornerup imaluunniit niuernerup iluani ilinniagaqarnertik nangissinnaanngorpaat.

TN-18-imi ilinniagaqartut allat suliffeqarfiit allat soorlu Qivioq Aps, Atlantic Music allallu suliaat saqqummiuppaat.

Allattoq: Inga Egede, ineg@royalgreenland.com

Assit: John David Eriksen

Asseq

 
 

Royal Greenland aperiguk

i
Write the text from the image