- Pisassiissutigineqareersut ilaneqarnerat Royal Greenlandip tunisassiornerata oktobarimi novembarimilu ingerlanneqaannarnissaanik kinguneqassasoq ilimagaarput, Royal Greenlandimi tunisassialerinermi ingerlatsisoq Sten Sørensen oqarpoq.

Tunisassialerinermi ingerlatsisoq oqarpoq, saarullinniarneq matuneqarmat oktobarip tallimaani matuneqarmat saarullittassiissutit 25.000 tonsiusut sipporlugit tamakkerlugillu aalisarneqareersimasut. Taamaattumik Sten Sørensenip ilimagaa, saniatigut pisassiissutigineqartut 2017-imi januaarip aallaqqaataa - tassa ulloq nutaanik saarullittassiissiffiusussaq - sioqqullugu aammaartumik tamakkerlugit aalisarneqareersimassasut.

- Saarullinniarneq matuneqarmat saarullittat 27.000 tonsiusimammata saniatigut pisassiissutigineqaqqittut annertussusaat decembari naallugu aalisartoqarsinnaanissaanik qulakkeerinnittuusinnaanerat qularutigaara. Taamaattumik ataatsimut isigalugu saniatigut pisassissutigineqartut 6.000 tonsiinnaapput.

Aningaasaqarnermut pingaaruteqarput

Taamaattorli saniatigut pisassiissutigineqartut Royal Greenlandip aningaasaqarniarneranut, sulisunut aalisartunullu pingaaruteqarput.

- Saniatigut pisassiissutigineqartut Qasigiannguani, Kangaatsiami, Sisimiuni Maniitsumilu saarulliit nerpiinik tunisassiorfinnut annermik pingaaruteqarput. Tamannali nunaqarfinni tunitsivinni amerlasuuni saarullinnik tarajortikkanik nunaqarfinnilu tunitsiviit ilaanni saarullinnik issittumi panertitanik ataavartumik tunisassiorsinnaanitsinnik minnerunngitsumillu saarullinnik qerinasuartitassanik illoqarfinni nunaqarfinnilu allani tunitsivinnut aamma ataavartumik tunisisoqarsinnaanissaanik kinguneqassaaq. Tassa imaappoq, saniatigut pisassiisoqarnera Royal Greenlandimut kisianni annertunerusumik sulisut aalisartullu aningaasaqarniarnerannut pingaaruteqarpoq, Sten Sørensen oqarpoq.

Saniatigut saarullittassiissutit 6000 tonsiusut Royal Greenlandip pilersuisuinut tassa aalisartunut 25-30 millionit missaannik naleqarput.

Allattoq: Inga Egede, ineg@royalgreenland.com

Asseq: RG

Asseq

 
 

Royal Greenland aperiguk

i
Write the text from the image