27-inik ukiullip Inuuteq Storchip Københavnimi assilisanik eqqumiitsuliornermi ilinniarfimmi Fotomorganami ilinniartitsisuata assilisanik eqqumiitsuliornermi ilinniarfiit nunarsuarmi pitsaanerpaartaanut innersuussimavaa. Inuuteq eqqumiitsuliortut inuusuttut nunani tamalaaneersut 70-it peqatigalugit International Center of Photography-mi ukioq ataaseq ilinniarami assiliineq, assilisat aallaavigalugit tusagassiorneq aamma assilisanik eqqumiitsuliorneq ilinniarpaa.

Eqqumiitsuliortoq immikkuullarissoq

- Assilisanik eqqumiitsuliornikkut immikkuullarissuunera pissutigalugu New Yorkimi ilinniarfimmut innersuunneqarpunga. Nammineq ilisimavara inuk namminiiussuseqarnera pillugu eqqumiitsuliortutut aamma inuttut eqqumiikajaartuunera. Assilisakka tamarluinnarmik Kalaallit Nunaaneersuusarput aamma eqqumiitsuliaralugit suliannik saqqummiussisarnera nunatsinneersuuniinoinniit aallaaveqartarput. Assilisama nunatsineersuuneri pissutigalu aamma immikkuullarissumik saqummiuttarneri pissutigalugu New Yorkimiinninni eqqumiitsulianik saqqummersitsinerni peqataatillunga suliakka uangalu suminngaaneersuunera soqutigineqarluartarput, Inuuteq Storch paarilluakkanik takisuunik kakkivissamigut umeqartoq, saamasunik iseqarluni nutsani qernariit qernertumik nasarsimallugit isikkumigut aamma immikkooruteqartoq oqarpoq.

-Immaqa assitigut saqqummiutakkakka aqqutigalugit misigissutsit oqimaatsut annittarakkit inuttut akuersaartumik saqqummernissara pingaartippara, oqarpoq.

Inuutip ukioq ataaseq New Yorkimiinnissi angorusullugu aningaasat 250.000-iniit amerlanerusut katersareqqaartariaqarsimavai. Marloriarluni New Yorkimi assilisanik eqqumiitsuliortut ilinniarfianni ilinniarnissaminut akuersissummik pereernikuulluni i 2015-imi pingajussaa akuersissummik pigami kissami angorusutani anguaa.

- Anguniagaralugu angugakku ukioq immikkuullareqqinnaartoq misigivarara, oqarpoq.

Ineriartorneq annertooq

Inuuteq inuusuttuaraallunili assiliinermik soqutigisaqarsimasoq International Center of Photography-mi septemberimi 2015-imiit 2016-imi aggustusip naanera tikillugu ilinniarami assilisat eqqumiitsuliatut suliarinerini, teknikkikkut aammalu inuttut ineriartorsimaqaaq.

- New Yorkimiinninni assilisanik eqqumiitsuliornerup iluani annertuumik ineriartorpunga, ingammik assilisat suliarinerini teknik eqqarsaatigalugu kisianni aamma inuttut. Aamma assilisanik eqqumiitsuliat atuakkatigut saqqummersinneqarsinnaaneri eqqarsaatigalugu aamma ineriartorpunga. Siornatigut assinik saqqummersitsinissara ukkatarinikuullugu maanna atuakkatigut assinik saqummersitsisinnaaneq periarfissaalluartoq ilikkagaqarfigaara. Aamma eqqumiitsuliortutut kinaassusera paasisaqarfigaara, ilaatigullu assilisanik nunatsinneersunik aallaaveqarlunga eqqumiitsiuliortarnera aallaavigalugu eqqumiitsuliortutut immikkoruteqarnera paasivara.

Inuuteq Storch oqarpoq New Yorkimi eqqumiitsuliortut ineriartorsinnaani periarfissaqarluartoq.

- Sivisunerusumik New Yorkimiinnissara periarfissaasimasuuppat eqqumiitsulianik saqqummersitsisoqarnerani naapitama suliffiutaami suliffimmik misiliinissannut periarfissaqaraluarpunga. Kisiannili arnaatigisannut, ilaquttannut aamma nunatsinnut angerlarserama angerlarpunga.

Suliat

Inuuteq Storch piffissaq sivisooq atorlugu Sisimiuni piniartup inuusuttup inuunera pillugu sammisaqarsimavoq, taamatuttaaq New Yorkimiinnermini assilisani aallaavigalugit atuakkamik saqqummersitsinissi siunertaraa. Kisiannili assilisanik eqqumiitsuliorneq nunatsinni inuussutissarsiutiginiarnera ajornakusoormat Inuuteq allatigut aamma inuuniuteqartariaqarpoq.

- New Yorkimi eqqumiitsuliornermik ilinniarfimmi ilinniaqatigisakka marluk peqatigalugit Sisimiuni Kultoorikkut illorsuarmi Taseralimmi 2017-imi aasaanerani assinik saqummersitsinissarput piareersarpara. Neriuutigaara assinik saqqummersitsineq aamma Nuummi takutissinnaajumaarlugu.

Inuuteq Storch ukioq ataaseq International Center of Photography-mi ilinniariarnissaminut aningaasat katersami ilai nammineerluni katersarai ilaali ilaatigut Royal Greenland A/S-imit taperneqarnermigut pissarsiaralugit.

Allattoq: Inga Egede, ineg@royalgreenland.com

Assit: Inuuuteq Storch aamma Inga Egede

Asseq

 
 

Royal Greenland aperiguk

i
Write the text from the image