- Sulilertussat 30-t nunatsinnut nuussapput, Royal Greenlandillu Maniitsumi, Uummannami Qasigiannguanilu tunisassiorfiutaani 2017-imi upernaakkut sulilissapput. Royal Greenlandip Kinami tuniniaanermut immikkoortortaani sulisoq inunnik 30-nik tunisassiorfinnut taaneqartunut suliartorlutik nunatsinnut nuukkusuttunik sulisussarsiorluni aallartereersoq qanimut oqaloqatigisarparput. Sulisut Kinameersut immaqalu nunanit allaneersut 2017-imi aasap ingerlanerani – aammalumi ukiut tulliuttut ingerlaneranni - amerlineqarnissaat siunertaavoq, Royal Greenlandip suliffeqarfissuarmi sulisoqarnermi ingerlatsisua Søren Olsen Damgaard oqarpoq.

Pisariaqarpoq

Suliffeqarfissuarmi sulisoqarnermut ingerlatsisup oqaatigaa, tunisassiorfiit aalisakkanik tunisanik tunisassiornissaminnut – ingammik ulapaarfiusuni – angummassinnaasanngimmata - naak tunisassiassat naammattaraluartut - sulisussaaleqisarneq suliffeqarfissuarmit iliuuseqarfiginiarneqalersoq.

- Tunisassiorfinni sulisut aalajaatsut pikkorissullu aamma suliffeqarfik sinnerlugu sulilluartut amerlagaluartut sulisunik amerlanerusunik pisarisaqartitsivugut. Sulisussaaleqisarnerput qaangerusullutigu sineriammit ukiuni arlaqartuni iluatsilluartartumik suliartortitsisarsimavugut, sulisussaaleqisarnerpulli ukiumiit ukiumut annertusiartuinnartarsimammat sulisussaaleqisarnerput ajoraluartumik qaangivinneq ajorparput. Nunami tunisassiorfiutitsinni uteqattaartumik sulisussaaleqisarnerput pissutigalugu sulisussanik nunanit allaneersunik tikisitsisariaqarpugut, Søren Olsen Damgaard oqarpoq.

Piareersarnerit

Suliartortussat nunanit allaneersut nunatsinnut nuullutillu nunatsinniiginnassasut siunertaavoq. Taamaattumik sulilertussanik sulisussarsiornermut tikilluaqqusinermullu suliniutit pisariallit siulliit Royal Greenlandimi sulisoqarnermut immikkoortortamit aallarnerneqarput.

- Sulisut nunanit allaneersut nunatsinnut nuunnissaat nunatsinniinnerminnilu tunisassiorfiutitsinni sulinissaat siunertaavoq. Taamaattumik tamatumunnga atatillugu inatsisit atuuttut misissorluarpavut. Nunatsinnut nuukkusuttunik sulisussarsigutta taakkua sinnerlugit nunatsinni najugaqarnissamut sulisinissamullu akuersissutinik qinnuteqassaagut, Søren Olsen Damgaard oqarpoq. Taamatuttaaq erseqqissaatigaa sulilertussat nunanit allaneersut sulisut nunaqavissutuulli assigiinnik periarfissaqartitaallutik sulisssasut.

- Akissaatinut tunngatillugu sulilertussat tunisassiorfiutitsinni sulisut allatuulli assigiinnik periarfissaqartitaassapput.

Sulilertussat angalanissaat ineqartitaanissaallu pillugit isumagisassat Royal Greenlandimit isumagineqassapput.

- Ininik attartortitsisartut assigiinngitsut attartornermut isumaqatigiissuteqarfigissavagut pisariaqassappallu illoqarfinni nunaqarfinnilu sulilertussat sulillutillu najugaqarfigisassaanni ininik ataasiakkaanik immaqa aamma pisissaagut. Maniitsumi init attartugassavut pillugit isumaqatigiissuteqaleruttorpugut, Søren Olsen Damgaard oqarpoq.

Royal Greenland nunanit allaneersunik – Kinameersunik tassa 2017-imi upernaakkut tikittussanik - sulisoqarnerup tungaatigut misilittakkanik katersereeruni nunanit allaneersunik allanik sulilersitsinissamut suliniuteqaqqissaaq.

- Misilittakkat nutaat takutissavaat, nunami tunisassiorfiutitta sulisussaaleqisarnerisa qaangernissaannut nunanit allaneersunik sulilersitsisarneq aaqqiissutitut siunissami atuinnassaneripput, Søren Olsen Damgaard oqarpoq.

Allattoq: Inga Egede, ineg@royalgreenland.com

Asseq: RG

Asseq

 
 

Royal Greenland aperiguk

i
Write the text from the image