- Royal Greenlandimi aalisarnermut siunnersortinit siunnersortinnissamut periarfissaq atorluarusullugu umiatsiaararlunga Ikerasaarsummiit Sisimiunukarpunga, Anthon Petersen Polar Fish 2016 Sisimiut Timersortarfiani sapaammi septembarip 25-ani ingerlanneqarmat Royal Greenlandip saqqummersitsivianut saaffiginninnermini oqarpoq.

Anthon Petersen aalisartut 30 missaat Sisimiut Timersortarfiani aalisarneq pillugu saqqummersitsisoqarnerani Royal Greenlandip saqqummersitsiviani aalisarnermut siunnersortaannut Siverth Amondsenimut aamma Therkel Mathiassenimut saaffiginnittut ilagaat. Aalisarnermut siunnersortit marluusut Royal Greenlandimit aningaasanik tapiiffigineqarnikkut aalisarnermut atortunik pisinermut, angallammik angisuumik aalisariuteeqqamilluunniit pisinermut tunngasunik siunnersuuteqartarput imaluunniit aalisartut kissaataasa piviusunngortinnissaannut ikiuussinnaasunut oqartussaasoqarfinnut allanut innersuussisarput.

Aningaasanik tapiiffigineqarnikuuvunga

- Royal Greenlandimi aalisarnermut siunnersortinit siusinnerusukkut siunnersortereernikuullungalu motoorimik nutaamik amoorummillu pisinermut Royal Greenlandimit aningaasanik tapiiffigineqarnikuuvunga. Taamanikkut angallatimma motooriata aserornera pissutigalugu motoorimik nutaamik pisinissannut Royal Greenlandimit aningaasanik 2015-imi upernaakkut tapiiffigineqarnissama tungaanut aalisarsinnaanikuunngilanga. Tassa imaappoq, Royal Greenlandimit aningaasanik tapiiffigineqarnissamut periarfissamik atorluaareernikuuvunga, Anthon Petersen oqarpoq, nangipporlu:

- Siunnersorneqaqqinnissara ajornanngippallu angallammik anginerusumik aalisariuteeqqamilluunniit pisinissannut aningaasanik tapiiffigineqaqqinnissara kissaatigigakku Sisimiuni aalisarneq pillugu saqqummersitsinermut orniguppunga, Anthon Petersen Sisimiut Timersortarfiani aalisarneq pillugu saqqummersitsinermi najuunnermini aningaaserivimmi sulisumik tuniniaasunillu saqqummersitsinermi saqqummersitsiviliusunik oqaloqateqarsimasoq oqarpoq.

Piumasaqaatit

Royal Greenlandimi aalisarnermut siunnersortip Therkel Mathiassenip oqaluttuaraa, Royal Greenland aalisartunut Royal Greenlandip tunisassiorfiinut tunisisartunut aningaasanik tapiissuteqartartoq. Taamaattorli piumasaqaatit aalisartunit malinneqartussat pissutigalugit aalisartut tamarmik aningaasanik taapiiffigineqarsinnaaneq ajortut aamma oqaluttuaraa.

- Aalisartut ataasiakkaat pisinermi akiusup sisamararterutaa namminneq akilersinnaagaangamikku, akiitsutik piffissap aalajangersimasup ingerlanerani naafferarsinnaappatigik pisortanullu akiitsoqanngippata aalisarnermut atortunik pisinermut imaluunniit angallammik angisuumik aalisariuteeqqamilluunniit pisinermut Royal Greenlandimit aningaasanik tapiiffigineqarnissaminnut periarfissaqarput. Aalisartut qaleralinniarnermut saarullinniarnermulluunniit akuersissummik allagartaqaraluarlutik taarsigassarsinissaminnut aningaaserivimmit itigartinneqarsimasut aningaasanik tapiiffigisarpavut, Therkel Mathiassen oqarpoq, nangipporlu:

- Aalisartut Royal Greenlandip tunisassiorfiisa ilaannut tunisigaangata Royal Greenlandimut aalisartunullu iluanaarutaasarmat aalisartunut aningaasanik tapiissuteqartarpugut.

Sullissineq

Aalisartut 30-usunit qulit missaat Sisimiuni aalisarneq pillugu saqqummersitsisoqarnerani saaffiginnittut Royal Greenlandimi aalisarnermut siunnersortinit massakkut sullinneqarput.

- Aalisartut siullerpaamik oqaloqatigereerutsigit qanoq annertutigisumik akiligassarsisinnaassuseqarnersut pisiarerusutaminnillu pisinissaminnut periarfissaat siullertut misissussavagut. Soorlu aalisarnermut akuersissumik allagartat misissussavagut, Imarsiornermik Qullersaqarfik attavigissavarput inuussutissarsiutinullu tapersiisarfimmit taarsigassarsinissaminnut periarfissaqarnersut misissusssavarput.

Anthon Petersenip Royal Greenlandimit aningaasanik tapiiffigineqarnissamut piumasaqaatit tamarmik eqquutsissinnaammagit angallammik angisuumik aalisariuteeqqamilluunniit piserusunnerminut atatillugu aningaasanik tapiiffigineqarnissaminut periarfissai Royal Greenlandimi aalisarnermut siunnersortinit misissorneqaleruttorput.

Allattoq assiliisorlu : Inga Egede, ineg@royalgreenland.com

Asseq

 
 

Royal Greenland aperiguk

i
Write the text from the image