Royal Greenland A/S saqqummersitsinermi soorunami aamma peqataassaaq, Royal Greenlandillu qullersaqarfiani sulisut sisamat saqqummersitsillutik, siunnersuillutik taamatuttaaq nunatsinni tunisassianik kiisalu tunisassiamik nutaamik Nutaaq Cod-imik ussassaaralutik suliffeqarfik Royal Greenland ussassaarutigissavaat. Taamatuttaaq Royal Greenlandip Sisimiuni tunisassiorfia sineriammiit tikeraartorpassuarnit Sisimiunilu innuttaasuinit ullumikkut sisamanngornermi aqagulu tallimanngornermi pulaarneqarsinnaavoq.

Polar Fish 206-imi Royal Greenland sinnerlugu peqataasut marluk - tassaasut aalisarnermut siunnersortit Siverth Amondsen aamma Therkel Mathiassen – Sisimiuni aalisartunut, suliffeqarfinnut saqqummersitsiartoqataasunut kiisalu Sisimiuni suliffeqarfinnut siunnersuillutik pingasunngormat aallartipput.

- Sisimiuni aalisartunut taamatuttaaq suliffeqarfinnut saqqummersitsiartoqataasunut Sisimiunilu suliffeqarfinnut siunnersuinissarput siumut isumaqtigiissutigisimavarput. Aalisarnermut tunngasunik soorlu aalisarnermut atortunik, umiatsiaaqqanik aalisariutinillu pisinissamut atatillugu inunnut ataasiakkaanut siunnersuineq massakkut ingerlatileruttorparput, Royal Greenlandimi aalisarnermut siunnersorti Siverth Amondsen oqarpoq.

Taamatuttaaq aalisarnermut siunnersortit marluk saqqummersitsinermi peqataasut Royal Greenlandip saqqummersitsiviani siunnersuisassapput.

- Kikkulluunniit qulaani taaneqartut pillugit siunnersortikkusut Sisimiut Timersortarfiani saqqummersitsivitsinnut saaffiginninnissaminnut tikilluaqqusaapput. Taamatuttaaq Polar Fish 2016-ip aqagu tallimanngornermi nal. 10:00-imiit sapaatiuppat ualikkut nal. 17:00-ip tungaanut ingerlanneqarnerani Royal Greenland A/S-imi ilinniartunngornissamut suliffittaarnissamullu periarfissat pillugit paasissutissanik tunioraassaagut, Siverth Amondsen oqarpoq.

Nutaaq Cod ussassaarutigineqassaaq

Royal Greenlandip nunatsinni tunisassianik tuniniaaviani tuniniaasup Kaassannguaq Zeebip nunatsinni tunisassiat kiisalu Royal Greenlandip tunisassiaa nutaaq - Nutaaq Cod-imik taaneqartartoq - saqqummersitsinermi siullertut ussassaarutigissavai.

- Tunisassiaq Nutaaq Cod atorlugu nerisassiamik igasoq Aalborg Zoo-meersoq suleqatigalugu sassaalliissaanga. Igasup Nutaaq Cod atorlugu nerisassiamik nalinginnaasuunngitsumik tassa

”Street Food”-imik taaneqartartumik saqqummersitsivitsinni sassaalliuteqarnissaminut neqeroorsimavoq, Kaassannguaq Zeeb oqaluttuarpoq, nangipporlu:

- Inuit allat nunatsinni tunisassianik atuisunngornissaat aamma anguniarlugu Polar Fishimi peqataavunga. Taamaattumik suliffeqarfiit assigiinngitsut saqqummersitsiviinnut Sisimiunilu suliffeqarfinnut assigiinngitsunut orniguttassaanga.

Kaassannguaq Zeeb Nutaaq Cod-ip saqqummersitsinermi ussassaarutigineqarnissaa pillugu isumalluarpoq.

- Neriuppunga Royal Greenlandip tunisassiaa nutaaq – Nutaaq Cod- suliffeqarfinnit assigiinngitsunit saqqummersitsinermi peqataasunit arajutsisimaneqassanngitsoq piumaneqarlualissasorlu.

Taamatuttaaq Kaassannnguaq Zeeb Brugsen Sisimiuni mamartuliaarniarfia suleqatigalugu tapasinik raajalikkanik ullumikkut sisamanngornermi nal. 15:00-imiit nal. 17:00-ip tungaanut ooqattaagassaqartitsissaaq.

Aalisarneq pillugu saqqummersitsineq Polar Fish 2016-imut atatillugu Royal Greenlandip Sisimiuni tunisassiorfia ullumikkut sisamanngornermi aqagulu tallimanngornermi nal. 11:00-imiit kiisalu aamma nal. 13:00-imiit pulaarneqarsinnaavoq.

Allattoq assiliisorlu: Inga Egede, ineg@royalgreenland.com.

Asseq

 
 

Royal Greenland aperiguk

i
Write the text from the image