- Illoqarfimmi imissaaleqineq ajornartorsiutaajunnaarpoq, taamaattumik maajimi saarullinnik tisaanik tunisassiulerattali aalaakkaasumik tunisassiorpugut. Naak sulisut holdit ataasiinnaat manna sulisorigalualuarlutigik 2015-imi ukioq tamaat tunisassiarisatsinniit ukioq manna tunisassiavut annertunerupput, Kangaatsiami Royal Greenlandip tunisassiorfiani ingerlatsisoq Abia Thorsteinsen oqarpoq.

Kangaatsiami imissaaleqineq pissutigalugu Royal Greenlandip tunisassiorfiani saarulliit nerpiinik tunisassiorneq 2015-imi oktoberimi unitsinneqarpoq taamaallaalli saarullinnik qeritanik tunisassiorneq ingerlanneqalerluni. Kingusinnerusukkut tunisassiorfimmi quersuit qerititsiviutigisaut ulikkaarmata tunisineq piffissaap ilaa unitsinneqartariaqartarpoq.

- Imissaqarniarnikkut ajornartorsiuteqarnerput Nukissiorfinniit aaqqiivigineqarmat neriuutigaara ukioq naallugu aalakkaasumik tunisassiorsinnaajumaarluta, Abia Thorsteinsen oqarpoq.

Unammillernartut

Kangaatsiami tunisassiorfimmi mannakkorpiaq inuit 45-it 50-illu akornanni sulisorineqarput. Taakkunannga inuit 35-it missingi saarullinnik tisallutik qeritanillu suliaqarput. Siorna paarlakaallutik sulisut sulisorineqarput ukioq mannali sulisut ullukkoortut kisimik sulisorineqarlutik.

- Sulisut sulinngitsoortarnerat unammillernarsimavoq – aamma ukioq manna sulisut ullukkoortut kisiisa sulisorigaluarlutigik. Tunisassiornitsinni malinnaasinnaagaluarpugut, kisianni sulisut sulinngitsoortarnerat aporfigisanngitsuugutsigu ukioq manna annertunerusunik tunisassiorsimasinnaagaluarpugut, Abia Thorsteinsen oqarpoq, nangipporlu:

- Aalisartut suleqatigilluarpagut, taakku saarullinnik niaqulinnik niaqoqanngitsunilluunniit uagut tunisassiorfimmi suliarisinnaasatsinnut naapertuuttumik tunisisarput. Maannamut suliassaqarpallaarneq pissutigalugu tunisineq unitsitsinneqanngilaq, ataasiarluta Royal Arctic Line pajuttataata ajoquteqarnera pissutigalugu sapaatip akunnera ataaseq tunisinerup matusariaqarsimanera eqqaassanngikkaanni.

Kangaatsiami Royal Greenlandip tunisassiorfiani siornatigut aalisakkanik qerititanik tunisassiorsimagaluartut 2015-imi maajimi aalisakkanik tisaanik tunisassiulerput.

Kangaatsiaami inuit 550-it najugaqarput, taakkunannga sulisinnaasut 348-iupput.

Allattoq: Inga Egede, ineg@royalgreenland.com

Assit: RG

Asseq

 
 

Royal Greenland aperiguk

i
Write the text from the image