- Kilisaatit attartukkat piffissami avaleraasartoorniarfiusumi sivikitsumik avaleraasartoorniarput. Avaleraasartuunut akitsuutip ammassassuit akitsuutaannit marloriaatingajammik qaffasinnerunera pissutigalugu ammassassuarniarneq imminut akilersinnaanerummat Royal Greenlandip nammineq kilisaataatai Tasiilaq aamma Tuneq Tunup imartaanut avannarpasinnerusumut siusinaartorujussuullutik ammassassuarniarput, Royal Greenlandimi suliniutilerinermi sulisoq Andrias Olsen oqarpoq.

Kilisaatit arfinillit pineqartut aamma Royal Greenland A/S-imit allaffissornikkut ingerlanneqarlutik kilisattut avaleraasartuut 6500 tonsit missaat pisaraat, massa avaleraasartat katillugit 35.000 tonsit missilioraat.

Royal Greenlandip nammineq kilisaataatai Tuneq aamma Tasiilaq kiisalu Tuugaalik aamma Royal Greenland A/S-imit allaffissornikkut ingerlanneqartut paggatassiinikkut avaleraasartassanit katillugit 3500 tonsinik pisaqarput, massa kilisaatit attartukkat avaleraasartuut 3000 tonsit missaat ukioq manna pisarigaat.

- Pisat annertunerusimasinnaagaluarput, avaleraasartoorniarnermili kilisaatit ilaat aseruanera kiisalu ammassassuarniarnissap siusinnerusukkut aallartinneqarnissaanut aalajangertoqarnera pissutigalugit pisat annertunngillat, Andrias Olsen oqarpoq.

Kingusissukkut avaleraasartoorniarneq

Royal Greenlandip kilisaataatai kilisaatillu attartugai pilersaarutit malilugit sapaatip-akunnerinik pingasunik kingusinaarlutik avaleraasartoornialerput.

- Siusinnerusukkut avaleraasartoornialernissarput pilersaarutaasimagaluarpoq, kilisaatilli ilaasa qerinasuartitsivia aseruammat avaleraasartoorniarneq juulip qiteqqunnerani aallartipparput. Taamanikkut avaleraasartoorniarneq sapaatip-akunnerini pingasuni ingerlanneqalereersimavoq, Andreas Olsen oqarpoq nangipporlu:

- Kilisaatit Islandimit attartukkat aamma avaleraasartuunik taamaallaat kilisaqqusaasut avaleraasartassiissutigineqartut katillugit 4400 tonsiusunit 3000 tonsit sapaatip-akunneri marluk ingerlaneranni pisaraat, tamannalu naammagisimaarparput.

Kilisaatip Tuugaaliup Kitaata imartaanut qaleralinniariartunnginnermini sapaatip-akunnerini arfinilingajanni avaleraasartoorniarpoq.

Ammassassuit 20.000 tonsit Kalaallit Nunaannut pisassiissutigineqarput. Kilisaatit marluk Tasiilaq aamma Tuneq Tunup imartaani massakkut ammassassuarniartut Tunup imartaani qaammatip matuma naanissaata tungaanut ammassassuarniassasut ilimagineqarpoq. Ammassassuit 4.000 tonsit massakkumut pisarereerpaat.

Allattoq: Inga Egede, ineg@royalgreenland.com

Asseq

 
 

Royal Greenland aperiguk

i
Write the text from the image