Taama oqarpoq Qaqortormiu 17-inik ukiulik Aatitta Nathansen. Aatitta 2015-imi septemberimiiit 2016-imi juuli tikillugu Spaniami AFS-erpoq.

Aatitta Nathansen 2015-imi septemberimi Spanialiarluni aallarami 16-iinnarnik ukioqarpoq. Qaammatit arfinillit siulliit arnat aappaariinni mikisumik meeralinni najugaqarpoq. Ilaqutariit Spaniap avannaatungaani marluinnik – galisienimiutut aamma spaniamiutut oqaaseqarfiusumi illoqarfimmi Santiago De Compostelami najugaqarput. Kingusinnerusukkut Aatitta ilaqutariinni allani illoqarfimmi La Coruñami najugaqalerpoq.

Aatitta Nathansenip Spaniami AFS-ernera Royal Greenland A/S-imit aningaasaliiffigineqarpoq.

Marluinnik oqaaseqarput

- Spaniameeqqaalerama spaniamiut oqaasii inooriassiallu paasiuminaatsissimavakka, ingammik imminnut oqaluutsillutik nipitoorsuarmik oqaluuttarnerat sungiukkuminaatsissimallugu. Kisianni piffissap ingerlanerani inooriaasiannut paasinnikkartulerpunga paasillugulu oqaluuteriaasiat imminnut malugeqqunermik aallaaveqartoq aammalu ileqqoriinnaraat. Santiagomi inuit marluinnik – tassalu galisienimiutut aamma spaniamiutut oqaaseqarmata oqaasii aamma paasiuminaatseqqaarsimavakka, Aatitta Nathansen oqaluttuarpoq.

Aatitta oqaaseqarfiusumi atuarfimmi atuarsimavoq. Galisisk sumiorpaluutaavoq Spaniap avannaatungaani inunnit ikinnerussuteqartunit atorneqartoq.

- Santiagomi innuttaasut annermik galisienimiutut oqaluttuupput, taamaattumik spaniameeqqaalerama spaniamiutut ilikkanngilanga. Kingusinnerusukkut unnukkut atuartarlunga spaniamiutut ilinniarsinnaaninnut periarfissaqalerama spaniamiutut ilikkalertulerpunga. Imaannaanngissimaqaaq ullukkut atuarfimmi atuareeraangama unnukkut atuariaqqittarnera, kisianni spaniamiutut ilikkarpunga, Aatitta Nathansen oqarpoq.

Aatitta qaammatit arfinillit Santiagomi najugaqareerluni ilaqutariinni allani najugaqalerluni illoqarfimmut La Coruñamut nuuppoq.

Inooriaatsitigut assigiinngissutsit

- Ilaqutariit siulliit najukkakka qanigisarilereerlugit ilaqutariinnut allanut nuuttariaqarnera soorngunami artornarpoq, kisiannili ilaqutariit najulikkakka pingasunik meerallit aamma qanigisarlerpakka, Aatitta Nathansen oqaluttuarpoq, nangippporlu:

- Spaniamiut ilaqutariissutsikkut ileqqui uagutsinniit allaanerupput. Ilaqutariit akunnerminni uagutsituulli ataqatigiitsiginngillat. Kisiannili spaniamiinninni ilikakkama, tassalu inooriaatsitigut assigiinngitsumik inooriaaseqarnitsinnut ilaasoq paasivara. Spaniamiinninnimi imminutilisarismanerulerpunga, Aatitta oqaluttuarpoq.

- Spaniamiinnera inuuninni annertuumik allannguivoq imminut pillunga ilikkagaqaqigama. Aallanngikkallarama inuk matoqqasuuvunga ittoortuullunga inoqatinnullu akuleruttuunganga. Spaniamiinninni ammanerulerpunga inuillu akornanniissinnaaneq ilikkarlugu. Spaniamiissimanera ullumikkut eqqarsaatigigaangakku nuannaarutigalugu eqqarsaatigisarpara imminut ilisarisimanerulernissannut periarfissiimmat. Minnerunngitsumik spaniamiinninni inuit ilisarisimalikkakka ilisarisimalersimagakkit pilluaatigeqaara, Aatitta Nathansen oqarpoq.

Aatitta maannakut Aasianni GUX-imi atuartuusup qularinngilluinnarpaa Spaniamiissimanini siunissami iluaqutigilerumaarlugu.

- Spaniamiutut oqalussinnaalernikuunera iluaqutigilerumaarlugu qularinngilara. Takornarissat oqaloqatigisinnaalerpakka immaqalu aamma nunalerineq nuannarisarigakku ilinniagaqarninnut atatillugu spaniamiutut oqalussinnaanera iluaqutigilerumaarpara, Aatitta oqarpoq imalu nangilluni:

- Una periarfissaq iluatsillugu Spaniami AFS-ersinnaaninnut periarfissiillutik aningaasaliisut qutsavigerusuppakka, imminut ilisarisimanerulerninnut, spanskit inooriaasiannik aamma oqaasiinik ilikkagaqarninnut taperneqarnera aqqutissiuisuummat.

Allattoq: Inga Egede, ineg@royalgreenland.com

Assit: Nammineq pigisat.

Asseq

 
 

Royal Greenland aperiguk

i
Write the text from the image