- Paamiuni nunatsinnilumi aalisarnerup tungaatigut ineriartortitseqataajuartarama Royal Greenland suleqatigalugu aalisariummik saattuarniutaasumik aalisagarniutaasumillu pisinera nuannaarutigaara. Aalisariutitaara saattuarniaariaatsip nutaap nunatsinni ineriartortinneqarnissaanut aallarniisuuvoq, Laila K-mik piginnittoq Siverth Knudsen oqarpoq.

Laila K 98,4 BT-usoq, meterit 20-ngajattut takissususeqartoq meterillu arfineq-marluttut silissuseqartoq Assens Skibsværft A/S-imi sananeqarpoq, tassanngaanniillu Paamiunut juulip qiteqqunnerani apuunneqarpoq.

Saattuarniarnermik aallussissaaq

Laila K saattuarniutitut aalisagarniutitullu naleqqussarlugu sanaajuvoq, kisianni Siverth Knudsenip saattuarniarneq aallunniarpaa. Avannarpasinnerusumi saattuarniarnermut akuersissutinik tunineqarnissani utaqqimaarpaa.

- Nuup Paamiullu eqqaanni saattuarniarnerit ammaqqinneqarnissaasa tungaannut Maniitsup Kangaamiullu eqqaanni, Qeqertarsuup Tunuani kiisalu Upernaviup eqqaani saattuarniarnissarput angorusoqaara. Kisianni Namminersorlutik Oqartussat saattuarniarnermut akuersissuteqarnissaat maannakkut utaqqimaarpara, Siverth Knudsen Kujataani aamma Nuup Paamiullu eqqaanni saattuarniarnermut akuersissutinik peqareersoq oqarpoq.

- Kujataani saattuarniarsinnaatitaagama Kujataani saattuarniaqqammerpugut. Kujataanili saattuartavut Paamiunut tulaassoriartortaratsigit Kujataani saattuarniarneq imminut akilersinnaanngilaq Paamiunut tunitsivimmut aqqut isorartuallaarmat. Taamaammat Maniitsup Kangaamiullu eqqaanni, Qeqertarsuup Tunuani kiisalu Upernaviup eqqaani saattuarniarnermut akuersissutinik tunineqarnissara maannakkut utaqqimaarpara. Avannarpasinnerusumi saattuarniarnermut akuersissutinik tunineqassaguma Royal Greenlandip Qeqertarsuarmi tunisassiorfianut tulaassuiartortassaagut, Siverth Knudsen oqaluttuarpoq.

Taamatuttaaq aalisariut Angunnguaq K 52 fodsiusoq aamma saattuarniutaasoq aalisagarniutaasorlu Siverth Knudsenimit pigineqarpoq.

- Sumiiffinni siornatigut saattuarniarfiusarsimanngitsuni misileraalluta saattuarniarnissatsinnut periarfissaqaleratta siunissami saattuarniarnermut isumalluarpunga, Siverth Knudsen oqarpoq.

Laila K aalisartunik arfinilinnik misilittagaqarluartunik inuttaqarpoq.

Allattoq: Inga Egede, ineg@royalgreenland.com

Assit: John David Eriksen

Asseq

 
 

Royal Greenland aperiguk

i
Write the text from the image